मनपाच्या ताफ्यात नव्या वाहनांची भर

मनपाच्या ताफ्यात नव्या वाहनांची भर

महापौरांच्या हस्ते लोकार्पण; महामार्गावरील वेस्ट मटेरियल उचलण्यास वेग
जळगाव : शहर महानगरपालिकेच्या सेवेत आणखी बळकटी देत तीन जेसीबी आणि दोन अत्याधुनिक अग्निशमन वाहने ताफ्यात दाखल झाली असून सोमवारी या वाहनांचे लोकार्पण महापौर दीपमाला काळे आणि उपमहापौर मनोज चौधरी यांच्या हस्ते करण्यात आले. लोकार्पणानंतर ही वाहने तात्काळ सेवेत दाखल करण्यात आली असून राष्ट्रीय महामार्ग क्रमांक ६ वरील साचलेले वेस्ट मटेरियल उचलण्याच्या कामाला गती मिळाली आहे.
शहरातील स्वच्छता व आपत्कालीन सेवांचा दर्जा उंचावण्यासाठी महापालिकेकडून सातत्याने प्रयत्न केले जात आहेत. नव्याने दाखल झालेल्या तीन जेसीबींच्या माध्यमातून रस्ते, नालेसफाई तसेच महामार्गालगत साचलेला कचरा व बांधकामातील उर्वरित मटेरियल हटविण्याची कामे अधिक वेगाने होणार आहेत. विशेषतः राष्ट्रीय महामार्ग क्रमांक ६ परिसरातील स्वच्छता मोहिमेला यामुळे चालना मिळाली आहे.
अग्निशमन दलात दोन अत्याधुनिक वाहनांची भर
महानगरपालिकेच्या अग्निशमन दलाला अधिक सक्षम करण्यासाठी यापूर्वीच सहा प्रभावी वाहने ताफ्यात समाविष्ट करण्यात आली होती. त्यात आता आणखी दोन अत्याधुनिक वाहनांची भर पडली आहे. यातील ‘वॉटर ब्राऊजर’ या वाहनाची पाणी साठवण क्षमता तब्बल १२ हजार लिटर असून, दोन सामान्य अग्निशमन वाहनांइतके पाणी एकाच वाहनात साठवले जाऊ शकते. तसेच ‘अॅडव्हान्स मल्टीपर्पज फाउंटन मशीन’मुळे आग विझवण्याच्या कारवाईत गती येणार असून आपत्कालीन परिस्थितीत कमी वेळेत प्रभावी नियंत्रण मिळवणे शक्य होणार आहे.
या लोकार्पण सोहळ्यास भाजप गटनेते प्रकाश बालाणी, शिवसेना (शिंदे गट) गटनेते विष्णू भंगाळे, शिवसेना (ठाकरे गट) गटनेते इब्राहिम पटेल, राष्ट्रवादी काँग्रेस (अजित पवार गट) गटनेते प्रफुल्ल देवकर, महिला व बालकल्याण समिती सभापती सिंधुताई कोल्हे, प्रभारी सहायक आयुक्त उदय पाटील, अग्निशमन अधिकारी भारत आदींसह माजी महापौर नितीन लढ्ढा, तसेच विविध नगरसेवक, पदाधिकारी आणि कर्मचारी मोठ्या संख्येने उपस्थित होते.