महाकालेश्वर–उत्तर भारत दर्शनासाठी ‘भारत गौरव’ ट्रेन

महाकालेश्वर–उत्तर भारत दर्शनासाठी ‘भारत गौरव’ ट्रेन

२५ एप्रिल ते ५ मे विशेष तीर्थयात्रा; दौंडहून सुटणार विशेष गाडी

पुणे (प्रतिनिधी) : केंद्र सरकारच्या ‘देखो अपना देश’ आणि ‘एक भारत श्रेष्ठ भारत’ या पर्यटन संकल्पनांना चालना देण्यासाठी भारतीय रेल्वेकडून ‘भारत गौरव एक्स्प्रेस’ ही विशेष पर्यटन गाडी चालविण्यात येत आहे. महाकालेश्वरासह उत्तर भारतातील प्रमुख तीर्थक्षेत्रांचे दर्शन घेऊ इच्छिणाऱ्या भाविकांसाठी २५ एप्रिल ते ५ मे या कालावधीत विशेष तीर्थयात्रेचे आयोजन करण्यात आले आहे.
या यात्रेचे नियोजन व अंमलबजावणी इंडियन रेल्वे केटरिंग अँड टुरिझम कॉर्पोरेशन (IRCTC) मार्फत करण्यात येणार आहे. या प्रवासात उज्जैन, मथुरा, हरिद्वार, ऋषिकेश, अमृतसर आणि वैष्णोदेवी या धार्मिक स्थळांचा समावेश असून भाविकांना सर्वसमावेशक सुविधा उपलब्ध करून देण्यात येणार आहेत.
‘भारत गौरव एक्स्प्रेस’ पुणे विभागातील दौंड स्थानकावरून २५ एप्रिल रोजी सकाळी ८ वाजता सुटणार असून ५ मे रोजी रात्री साडेआठ वाजता पुन्हा दौंड येथे परत येणार आहे. यात्रेदरम्यान मथुरा, हरिद्वार, अमृतसर आणि वैष्णोदेवी येथे मुक्कामाची सोय करण्यात येणार आहे. बुकिंग केलेले प्रवासी पुणे, लोणावळा, कर्जत, कल्याण, वसई रोड, सुरत, वडोदरा आणि उज्जैन या स्थानकांवरून गाडीत चढू किंवा उतरू शकतात.
देशांतर्गत तसेच परदेशी पर्यटकांना भारताचा समृद्ध सांस्कृतिक व धार्मिक वारसा अनुभवता यावा, या उद्देशाने ‘भारत गौरव’ पर्यटन उपक्रम राबविण्यात येत आहे. या विशेष तीर्थयात्रेला भाविकांकडून उत्स्फूर्त प्रतिसाद मिळण्याची अपेक्षा व्यक्त करण्यात येत आहे.