महागड्या मोबाईल चोरीप्रकरणी अल्पवयीन संशयित ताब्यात एमआयडीसी पोलिसांची २४ तासांत कारवाई; २ लाखांचे

महागड्या मोबाईल चोरीप्रकरणी अल्पवयीन संशयित ताब्यात
एमआयडीसी पोलिसांची २४ तासांत कारवाई; २ लाखांचे मोबाईल जप्त

जळगाव (प्रतिनिधी): एमआयडीसी पोलिसांनी अवघ्या २४ तासांत मोबाईल चोरीचा गुन्हा उघडकीस आणत दोन ॲपल आयफोन आणि एक वन प्लस मोबाईल असा सुमारे २ लाख रुपयांचा माल हस्तगत केला आहे. या प्रकरणी एका अल्पवयीन मुलाला ताब्यात घेण्यात आले आहे.

नशेमन कॉलनीतील रहिवासी तन्वीर मजहर पटेल यांच्या घरात १८ मे २०२५ रोजी मध्यरात्री २ ते ३ वाजण्याच्या सुमारास अज्ञात चोरट्याने घुसून मोबाईल चोरी केली होती. याप्रकरणी १९ मे रोजी एमआयडीसी पोलीस ठाण्यात गुन्हा नोंदवण्यात आला.पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपविभागीय अधिकारी संदीप गावित यांच्या मार्गदर्शनाखाली पोलीस निरीक्षक संदीप पाटील यांच्या नेतृत्वात तपासाला सुरुवात झाली.

डीबी पथकाने घटनास्थळाची पाहणी, परिसरातील सीसीटीव्ही फुटेज तपासणी आणि गुप्त माहितीच्या आधारे तपास केला.यादरम्यान, फिर्यादीच्या घराजवळ संशयास्पदरीत्या फिरणाऱ्या एका अल्पवयीन मुलाची माहिती पोलिसांना मिळाली. त्यानुसार पोलिसांनी शोधमोहीम राबवत त्याला ताब्यात घेतले. चौकशीदरम्यान, त्याने गुन्ह्याची कबुली दिली, आणि त्याच्याकडून चोरीस गेलेले सर्व मोबाईल जप्त करण्यात आले.