महानगरपालिकेच्या महासभेत सभापतींची बिनविरोध निवड

महानगरपालिकेच्या महासभेत सभापतींची बिनविरोध निवड

डॉ. चंद्रशेखर पाटील स्थायी समितीपदी, सिंधू कोल्हे महिला-बालकल्याण समितीच्या सभापती
जळगाव | प्रतिनिधी : महापालिकेच्या विशेष महासभेत शुक्रवारी २७ रोजी स्थायी समिती व महिला-बालकल्याण समिती सभापतींची निवड प्रक्रिया पार पडली. या प्रक्रियेत भाजपचे डॉ. चंद्रशेखर पाटील यांची स्थायी समिती सभापतीपदी, तर शिवसेनेच्या सिंधू कोल्हे यांची महिला व बालकल्याण समिती सभापतीपदी बिनविरोध निवड जाहीर करण्यात आली.

महापालिकेच्या दुसऱ्या मजल्यावरील सभागृहात सकाळी ११ वाजता विशेष महासभा आयोजित करण्यात आली होती. व्यासपीठावर पीठासीन अधिकारी तथा जिल्हा परिषद मुख्य कार्यकारी अधिकारी मीनल करनवाल, मनपा आयुक्त ज्ञानेश्वर ढेरे तसेच नगरसचिव सतीश शुक्ला उपस्थित होते. सभेच्या प्रारंभी पीठासीन अधिकाऱ्यांनी स्थायी समिती सभापतिपदासाठी प्राप्त अर्जांची माहिती दिली.

डॉ. चंद्रशेखर पाटील यांचे चार अर्ज दाखल झाले होते. पहिल्या अर्जावर सूचक म्हणून नितीन लढ्ढा व अनुमोदक म्हणून विशाल भोळे यांची नावे होती. अर्ज छाननीनंतर १५ मिनिटांचा माघारीचा अवधी देण्यात आला; मात्र या कालावधीत कोणताही अर्ज मागे घेण्यात न आल्याने डॉ. पाटील यांची बिनविरोध निवड जाहीर करण्यात आली.
त्यानंतर महिला व बालकल्याण समिती सभापतिपदासाठी अर्जांची छाननी करण्यात आली. सिंधू कोल्हे यांचे दोन अर्ज प्राप्त झाले होते. पहिल्या अर्जात सूचक म्हणून प्रतिभा देशमुख व अनुमोदक म्हणून अमृता सोनवणे यांनी स्वाक्षऱ्या केल्या होत्या. छाननीनंतर देण्यात आलेल्या १५ मिनिटांच्या मुदतीत इतर कोणताही अर्ज मागे न घेतल्याने सिंधू कोल्हे यांचीही बिनविरोध निवड घोषित करण्यात आली.

निवडीनंतर महायुतीच्या कार्यकर्त्यांनी जल्लोष केला. महापौर दीपमाला काळे व उपमहापौर मनोज चौधरी यांनी पुष्पगुच्छ देऊन नव्या सभापतींचे अभिनंदन केले. त्यानंतर दोन्ही सभापतींनी आपल्या कक्षात जाऊन पदभार स्वीकारला.

दरम्यान, महानगरपालिका सभागृह नेतेपदासाठी ज्येष्ठ नगरसेवक तथा माजी महापौर नितीन बालमुकुंद लढ्ढा यांच्या नावाची शिफारस गटनेते प्रकाश बालाणी यांनी केल्याची माहिती समोर आली असून त्याबाबतची अधिकृत घोषणा लवकरच होणार असल्याचे संकेत मिळत आहेत.