महापालिका निवडणुकीसाठी माजी महापौर ललित कोल्हे जळगाव कारागृहात येणार

महापालिका निवडणुकीसाठी माजी महापौर ललित कोल्हे जळगाव कारागृहात येणार

न्यालयाकडूनअर्ज मंजूर; जामिनासाठी उच्च न्यायालयात धाव घेण्याची तयारी

जळगाव : महानगरपालिका निवडणुकीची रणधुमाळी सुरू असताना बोगस कॉल सेंटर प्रकरणात नाशिक कारागृहात न्यायालयीन कोठडीत असलेले माजी महापौर ललित कोल्हे यांना निवडणूक प्रक्रिया पूर्ण करण्यासाठी जळगाव कारागृहात येण्याची परवानगी न्यायालयाने दिली आहे. त्यानुसार दि. २९ डिसेंबर ते दि. ३ जानेवारी या कालावधीत कोल्हे यांना जळगाव कारागृहात आणण्यात येणार आहे.

जळगाव महानगरपालिका निवडणुकीसाठी दि. २३ डिसेंबरपासून उमेदवारी अर्ज दाखल करण्यास सुरुवात झाली असून, राजकीय वातावरण तापले आहे. या पार्श्वभूमीवर बोगस कॉल सेंटर प्रकरणात संशयित म्हणून नाशिक कारागृहात असलेले माजी महापौर ललित कोल्हे यांनीही निवडणूक लढविण्याची तयारी दर्शविली आहे. उमेदवारी अर्ज दाखल करणे तसेच संबंधित प्रशासकीय प्रक्रिया पूर्ण करण्यासाठी जळगाव कारागृहात आणण्याची परवानगी मिळावी, यासाठी त्यांनी प्रथम वर्ग न्यायदंडाधिकारी न्यायालयात अर्ज दाखल केला होता. न्यायालयाने हा अर्ज मंजूर करत दि. २९ डिसेंबर ते दि. ३ जानेवारी या कालावधीत जळगाव कारागृहात ठेवण्याची परवानगी दिली आहे.

जामिनासाठी उच्च न्यायालयात धाव
दरम्यान, बोगस कॉल सेंटर प्रकरणात माजी महापौर ललित कोल्हे यांचा जामीन अर्ज खालच्या न्यायालयाने फेटाळून लावला आहे. त्या निर्णयाविरोधात कोल्हे हे उच्च न्यायालयात दाद मागणार असल्याची माहिती सूत्रांनी दिली. त्यामुळे निवडणुकीपूर्वी कोल्हे यांना जामीन मिळतो की ते कारागृहातूनच महापालिका निवडणूक लढवितात, याकडे राजकीय वर्तुळाचे लक्ष लागून आहे.