महापालिकेचा १५२५ कोटींचा अर्थसंकल्प मंजूर

महापालिकेचा १५२५ कोटींचा अर्थसंकल्प मंजूर

स्थायी समितीकडून ५२ कोटींहून अधिक वाढ; विकासकामांना चालना

जळगाव : महापालिका प्रशासनाने सादर केलेल्या १४५२ कोटी रुपयांच्या मूळ अंदाजपत्रकात स्थायी समितीने ५२ कोटी ५६ लाख ८६ हजारांची वाढ सुचवून अखेर १५२५ कोटी १२ लाख रुपयांचा अर्थसंकल्प मंजूर केला. बुधवारी स्थायी समिती सभापती डॉ. चंद्रशेखर पाटील यांच्या अध्यक्षतेखाली झालेल्या बैठकीत या अर्थसंकल्पाला मंजुरी देण्यात आली.
बैठकीस मनपा आयुक्त ज्ञानेश्वर ढेरे, अतिरिक्त आयुक्त शोभा बाविस्कर, उपायुक्त धनश्री शिंदे, मुख्य लेखा परीक्षक विजयकुमार सोनवणे, नगरसचिव सतीश शुक्ला यांच्यासह समिती सदस्य व अधिकारी उपस्थित होते. प्रशासनाने मांडलेल्या महसुली अंदाजात स्थायी समितीने लक्षणीय वाढ करत कर वसुलीचे उद्दिष्ट अधिक बळकट केले.
खुल्या भूखंड करातून अपेक्षित महसुलात वाढ करून तो १५ कोटी ६४ लाखांवर नेण्यात आला, तर मालमत्ता कर वसुलीचे उद्दिष्ट १५९ कोटी ३९ लाखांपर्यंत वाढविण्यात आले. नगररचना विभाग, किरकोळ वसुली विभाग आदी विविध घटकांमधून मिळणाऱ्या उत्पन्नातही वाढीव अंदाज नोंदविण्यात आला.

दरम्यान, अनावश्यक खर्चावर स्थायी समितीने कात्री लावत दूरध्वनी, प्रशिक्षण, वाहन खरेदी, नालेसफाई आदी खर्चात कपात सुचवली. दुसरीकडे, रस्ते, पथदिवे, गटारी, पाणीपुरवठा, मलनिस्सारण, विद्युत व्यवस्था यांसारख्या मूलभूत सुविधांसाठीच्या तरतुदींमध्ये मोठी वाढ करण्यात आली आहे.

नवीन रस्त्यांसाठी ३० कोटी, पथदिव्यांसाठी ५ कोटी, गटार बांधकामासाठी १० कोटी, तसेच पाणीपुरवठा व मलनिस्सारण योजनांसाठी वाढीव निधीची तरतूद करण्यात आली. या सुधारित अर्थसंकल्पामुळे शहरातील पायाभूत सुविधा आणि विकासकामांना गती मिळणार असल्याचा विश्वास व्यक्त करण्यात येत आहे.