महापौरांच्या मध्यस्थीने जळगाव मनपाची जप्ती टळली; आयुक्तांची खुर्ची आणि गाडी वाचली!
२५ लाखांचा धनादेश न्यायालयात जमा; उर्वरित रकमेसाठी एक महिन्याची मुदत
जळगाव: विकासकामांसाठी संपादित केलेल्या जागेचा मोबदला वेळेत न दिल्यामुळे जळगाव महानगरपालिकेवर बुधवारी जप्तीची नामुष्की ओढवली होती. प्रत्यक्ष जप्ती पथक महापालिकेत धडकल्याने एकच खळबळ उडाली, मात्र महापौर दिपमाला काळे यांनी तातडीने हस्तक्षेप करत २५ लाखांचा भरणा केल्यामुळे आयुक्तांची खुर्ची आणि गाडी जप्त होण्यापासून वाचली.
शिवाजी नगर परिसरातील मेहता यांची जमीन महापालिकेने विकासकामांसाठी संपादित केली होती. या जमिनीच्या मोबदल्याबाबत न्यायालयाने चार वर्षांपूर्वीच आदेश दिले होते. मात्र, महापालिकेने वारंवार मुदत घेऊनही रक्कम भरली नाही. अखेर न्यायालयाने जप्तीचे वॉरंट काढल्याने वकील ॲड. एन. आर. लाठी आणि न्यायालयाचे बेलीफ बुधवारी (१० एप्रिल) जप्तीसाठी महापालिकेत दाखल झाले.
जप्ती पथक धडकताच पालिकेत धावपळ
जप्ती पथकाने थेट आयुक्तांची खुर्ची, गाडी आणि इतर प्रशासकीय साहित्य जप्त करण्याची तयारी सुरू केली. यामुळे महापालिकेत मोठी खळबळ उडाली. परिस्थिती हाताबाहेर जात असल्याचे पाहून महापौर दिपमाला काळे यांनी तातडीने उपमहापौर मनोज चौधरी आणि आयुक्त ज्ञानेश्वर ढेरे यांच्यासह कायदेशीर प्रतिनिधींशी चर्चा केली.
तात्काळ २५ लाखांचा भरणा
चर्चेनंतर महापौरांनी तात्काळ २५ लाख रुपयांचा धनादेश न्यायालयात जमा करण्याचा निर्णय घेतला. उर्वरित रक्कम भरण्यासाठी महापालिकेने एक महिन्याची मुदत मागितली आहे. या अटीवर जप्तीची कारवाई तात्पुरती स्थगित करण्यात आली. मात्र, मुदतीत पैसे न भरल्यास पुन्हा कठोर कारवाई करण्याचा इशारा न्यायालयाने दिला आहे.
प्रशासकीय दिरंगाईवर टीका
या घटनेमुळे महापालिकेच्या प्रतिमेला मोठा धक्का बसला आहे. प्रशासनाच्या दिरंगाईमुळेच नामुष्कीची वेळ आल्याची चर्चा शहरात रंगली आहे. भविष्यात अशा आर्थिक फटक्यांपासून वाचण्यासाठी आरक्षित जागांबाबत धोरणात्मक निर्णय घेण्याची गरज आता व्यक्त केली जात आहे.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
