महार वतन जमीन खरेदीची एसआयटीकडून चौकशी करा – अनिल अडकमोल

महार वतन जमीन खरेदीची एसआयटीकडून चौकशी करा – अनिल अडकमोल
प्रतिनिधी जळगाव
मानपुर येथील महार वतन जमिनीच्या बनावट खरेदी व्यवहाराला नवे वळण लागले असून या खरेदीची एसआयटीमार्फत चौकशी करण्यात यावी, आरोपींवर गुन्हा दाखल करून अटक करण्याची मागणी मागणी रिपब्लिकन पार्टी ऑफ इंडिया ( आठवले गट ) चे महानगराध्यक्ष , नगरसेवक अनिल अडकमोल यांनी केली.

३१ मार्चरोजी पत्रकार परिषदेत त्यांनी सांगितले की, मानपुर (ता. मुक्ताईनगर) येथील रहिवासी चमेलीबाई तुकाराम तायडे यांच्या मालकीची महार वतन जमीन २००२ साली खरेदी करण्यात आली होती. मात्र ही जमीन माजी मंत्री एकनाथ खडसे यांची मुलगी शारदा खडसे यांच्या नावावर करण्यात आल्याचा आरोप आहे.

ज्या कारणासाठी ही जमीन खरेदी दर्शवण्यात आली तेथे अद्याप कोणतेही कारखाना उभारणीचे काम झाले नाही त्यामुळे मूळ मालकांना जमीन परत देण्यात यावी, अशी मागणीही करण्यात आली. बोडवड पोलीस स्टेशन येथे खरेदी-विक्री व्यवहारात फसवणूक केल्याचा गुन्हा दाखल करण्यात यावा, अशी मागणी अडकमोल यांनी केली. एकनाथ खडसे व त्यांच्या मुलीच्या नावावर अॅट्रॉसिटी अॅक्टसह विविध फौजदारी गुन्हे दाखल करून अटक करण्याचीही मागणी करण्यात आली आहे. या व्यवहारात सहभागी अधिकाऱ्यांवरही कारवाई करण्याची मागणी त्यांनी केली. विधानसभेतही या विषयावर आमदार चंद्रकांत पाटील यांनी प्रश्न उपस्थित केला होता. महसूलमंत्री चंद्रकांत बावनकुळे यांनी ती जमीन महार वतन असल्याचे स्पष्ट केल्याचेही अडकमोल यांनी सांगितले. या पत्रकार परिषदेला तक्रारदार चमेलीबाई तायडे यांच्यासह अशोक तायडे, संतोष तायडे, उत्तम तायडे, सौरभ तायडे आदी उपस्थित होते.