महिला बचत गटांसाठी राज्यात ‘उमेद मॉल’; मंत्रीमंडळ बैठकीत मंजूरी

महिला बचत गटांसाठी राज्यात ‘उमेद मॉल’; मंत्रीमंडळ बैठकीत मंजूरी

जळगाव ;-राज्यातील ग्रामीण महिला बचत गटांच्या उत्पादनांना बाजारपेठ उपलब्ध करून देण्यासाठी ‘उमेद-महाराष्ट्र राज्य ग्रामीण जीवनोन्नती अभियान’ अंतर्गत १० जिल्ह्यांमध्ये ‘उमेद मॉल’ (जिल्हा विक्री केंद्र) उभारण्यास आज झालेल्या मंत्रिमंडळ बैठकीत मान्यता देण्यात आली. बैठकीच्या अध्यक्षस्थानी मुख्यमंत्री देवेंद्र फडणवीस होते. या योजनेसाठी एकूण २०० कोटी रुपयांचा निधी मंजूर करण्यात आला आहे.
ग्रामीण भागातील महिलांतील उद्यमशीलतेला चालना देणे आणि स्वयं-सहाय्यता समूहांच्या (SHG) उत्पादनांना स्थानिक व राष्ट्रीय बाजारपेठ मिळवून देणे या उद्देशाने हे मॉल उभारले जाणार आहेत. पहिल्या टप्प्यात १० जिल्ह्यांत ही योजना राबविण्यात येईल. नंतर टप्प्याटप्प्याने अन्य जिल्ह्यांत विस्तार करण्यात येणार आहे.
प्रत्येक मॉलसाठी कमाल २० कोटी रुपयांपर्यंत खर्च केला जाणार आहे. हे मॉल संबंधित जिल्हा परिषदेच्या जागेवर उभारले जातील. मॉलमध्ये गटांसाठी चक्राकार गाळ्यांची व्यवस्था, तसेच संवाद, प्रशिक्षणासाठी स्वतंत्र हॉलसारख्या सुविधा असतील.
जिल्हा परिषदांकडून प्रस्ताव मागवले जाणार असून, ज्या जिल्ह्यांमध्ये मॉलसाठी योग्य व मध्यवर्ती जागा उपलब्ध असेल, त्या जिल्ह्यांची निवड केली जाणार आहे.
योजनेची निविदा प्रक्रिया, आराखडे तयार करणे व इतर तांत्रिक बाबींची अंमलबजावणी राज्य अभियानाचे मुख्य कार्यकारी अधिकारी करतील. देखभाल व व्यवस्थापन जिल्हा परिषदेमार्फत होईल.
या पार्श्वभूमीवर, जळगाव जिल्ह्यात जिल्हा नियोजनच्या निधी मधून पालकमंत्री, जिल्ह्यातील मंत्री,खासदार, आमदार यांच्या मान्यतेने उमेद मार्फत या योजनेची अंमलबजावणी ‘बहिणाबाई मार्ट’ या नावाने पूर्वीच सुरू झाली आहे. पालकमंत्री गुलाबराव पाटील यांच्या मार्गदर्शनाखाली, जिल्हाधिकारी या योजनेची प्रभावी अमलबजावणीमुळे ग्रामीण भागात पाच आणि शहरी भागात पाच अशा दहा विक्री केंद्रांचे भूमीपूजन पूर्ण झाले असून, बांधकामास सुरुवात करण्यात आली आहे.
या प्रकल्पाच्या अंमलबजावणीसाठी जिल्हा परिषदेच्या मुख्य कार्यकारी अधिकारी मीनल करनवाल आणि जिल्हा ग्रामीण विकास यंत्रणाचे प्रकल्प संचालक राजू लोखंडे हे काम पाहत आहेत.
आजच्या मंत्री मंडळ बैठकीत ग्रामीण महिलांच्या आर्थिक सबलीकरणासाठी, स्थानिक उत्पादनांना सशक्त बाजारपेठ मिळवून देण्यासाठी आणि गटांना टिकाव मिळवून देण्यासाठी ‘उमेद मॉल’ योजना मंजूर झाली आहे. हा बचत गट चळवळीच्या आर्थिक उन्नतीसाठी एक महत्त्वपूर्ण टप्पा ठरणार असल्याची भावना पालकमंत्री गुलाबराव पाटील यांनी व्यक्त केली आहे.