महिलेचा विनयभंग; पतीवर बॅटने हल्ला
घरात घुसून मारहाण; संशयिताविरुद्ध गुन्हा दाखल
अमळनेर : शहरातील एका भागात महिलेचा विनयभंग करत तिच्यावर मारहाण करण्यात आली, तसेच तिच्या पतीवर बॅटने हल्ला करून जखमी केल्याची धक्कादायक घटना २९ मार्च रोजी सायंकाळी साडेपाच वाजेच्या सुमारास घडली. या प्रकरणी पोलिसांत गुन्हा दाखल करण्यात आला आहे.
मिळालेल्या माहितीनुसार, संबंधित महिला अंगण झाडण्यासाठी बाहेर आली असता संशयित संजय देविदास खैरनार हा तिच्याकडे टक लावून पाहत अश्लील इशारे करत होता. ही बाब महिलेने त्याच्या पत्नीला सांगितल्यानंतर संशयित आणि त्याची पत्नी दोघेही संतप्त होऊन महिलेच्या घरात घुसले.
यानंतर त्यांनी महिलेला शिवीगाळ करत मारहाण केली व तिचा विनयभंग केल्याचा आरोप आहे. दरम्यान, महिलेचा पती वाद सोडवण्यासाठी पुढे आला असता संशयिताने त्याच्या डोक्यावर बॅटने वार करण्याचा प्रयत्न केला. तो वार हातावर झेलल्याने पती जखमी झाला.
या घटनेप्रकरणी अमळनेर पोलीस ठाण्यात गुन्हा नोंदविण्यात आला असून पुढील तपास हेडकॉन्स्टेबल प्रमोद पाटील करीत आहेत.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
