माझं जळगाव, स्वच्छ जळगाव’: महापौर दीपमाला काळे यांच्या आदेशाने जळगावात स्वच्छतेचा धडाका

‘माझं जळगाव, स्वच्छ जळगाव’: महापौर दीपमाला काळे यांच्या आदेशाने जळगावात स्वच्छतेचा धडाका

मेहरूणसह दाणा बाजार, नेताजी सुभाष चौक भागात साफसफाई

जळगाव : ‘माझं जळगाव, स्वच्छ जळगाव’ हे ब्रीदवाक्य घेऊन जळगाव शहर सुंदर आणि प्रदूषणमुक्त करण्यासाठी महापौर दीपमाला काळे यांनी आक्रमक पाऊले उचलली आहेत. नागरिकांच्या तक्रारींची दखल घेत महापौरांनी दिलेल्या तातडीच्या आदेशानुसार, महापालिकेच्या आरोग्य विभागाने मेहरूण आणि शहरातील मुख्य व्यापारी संकुलांच्या परिसरात विशेष स्वच्छता मोहीम राबवली.

*या परिसरांचा पालटला चेहरा*
गेल्या काही दिवसांपासून शहरातील विविध भागांतून साफसफाई करण्याची मागणी नागरिकांकडून सातत्याने होत होती. या पार्श्वभूमीवर महापौरांनी आरोग्य विभागाला कडक सूचना दिल्या होत्या. त्यानुसार आज आरोग्य विभागाच्या कर्मचाऱ्यांनी स्वच्छता केली.

*मेहरूण परिसर*: येथील स्मशानभूमी परिसरात साचलेली घाण आणि वाढलेले गवत काढून संपूर्ण परिसर स्वच्छ करण्यात आला.
*नेताजी सुभाषचंद्र बोस चौक*: शहरातील वर्दळीच्या या भागात पडलेला कचरा उचलून परिसर चकाचक करण्यात आला.
*दाणा बाजार*: दाणा बाजार परिसरातील जनता बँकेच्या मागील बाजूस असलेल्या कचऱ्याच्या डेपोची सफाई करून तो भाग निर्जंतुक करण्यात आला.

*महापौरांचा स्वच्छतेवर भर*
पदभार स्वीकारल्यापासून २ महिन्यांतच महापौर दीपमाला काळे यांनी शहराच्या स्वच्छतेला सर्वोच्च प्राधान्य दिले आहे.महापौरांच्या या ‘ॲक्शन मोड’मुळे शहरात स्वच्छतेचा धडाका सुरू झाला असून, नागरिकांमधून समाधान व्यक्त केले जात आहे. आरोग्य विभागाच्या या मोहिमेमुळे परिसरात साचलेल्या कचऱ्याची समस्या सुटली आहे.

“नागरिकांच्या आरोग्याशी कोणतीही तडजोड केली जाणार नाही, तक्रार प्राप्त होताच संबंधित प्रभागात स्वच्छता कर्मचाऱ्यांमार्फत तातडीने कार्यवाही केली जाईल,” असे महापौरांनी स्पष्ट केले आहे.