मानपूर जमीन प्रकरणात आमदार एकनाथ खडसे व कन्येविरुद्ध फसवणुकीसह ॲट्रासिटीचा गुन्हा

मानपूर जमीन प्रकरणात आमदार एकनाथ खडसे व कन्येविरुद्ध फसवणुकीसह ॲट्रासिटीचा गुन्हा

जळगाव : भुसावळ तालुक्यातील मानपूर येथील जमीन खरेदीप्रकरणात फसवणूक व अनुसूचित जाती-जमाती अत्याचार प्रतिबंधक कायद्यांतर्गत आमदार एकनाथ खडसे व त्यांची कन्या शारदा खडसे यांच्याविरुद्ध बोदवड पोलीस ठाण्यात गुन्हा दाखल झाल्याने जिल्ह्यात खळबळ उडाली आहे.

तक्रारदार चमेलाबाई तुकाराम तायडे यांच्या म्हणण्यानुसार, २००२ साली साखर कारखाना उभारण्याच्या नावाखाली त्यांची महार वतनाची जमीन खरेदी करण्यात आली. त्यावेळी मोबदला व रोजगाराचे आश्वासन देण्यात आले होते. मात्र पूर्ण पैसे देण्यात आले नाहीत. पुढील चौकशीत संबंधित जमीन शारदा खडसे यांच्या नावावर नोंद झाल्याचे समोर आले.

तसेच खरेदीखतात खाडाखोड करून नावात बदल केल्याचा आरोपही करण्यात आला आहे. याबाबत जिल्हाधिकाऱ्यांकडे तक्रार करण्यात आल्यानंतर चौकशीचे आदेश देण्यात आले होते.

यानुसार एकनाथ खडसे, शारदा खडसे, मध्यस्थ सुधाकर पाटील तसेच दुय्यम निबंधक कार्यालयातील तत्कालीन अधिकारी व कर्मचाऱ्यांविरुद्ध विविध कलमांखाली गुन्हा दाखल करण्यात आला आहे. या प्रकरणाचा पुढील तपास पोलिसांकडून सुरू आहे.