मार्चमध्ये रेशनमध्ये मका-ज्वारीचे वितरण

मार्चमध्ये रेशनमध्ये मका-ज्वारीचे वितरण

हमीभावात खरेदी केलेल्या भरड धान्यांचा लाभ; जिल्ह्यातील लाखो लाभार्थ्यांना दिलासा

जळगाव : जिल्ह्यातील स्वस्तधान्य दुकानांमधून मार्च महिन्यात गहू-तांदळाबरोबरच मका व ज्वारीचेही वितरण करण्यात येणार आहे. केंद्र व राज्य शासनाकडून शेतकऱ्यांकडून हमीभावात खरेदी केलेल्या भरड धान्यांचा साठा उपलब्ध असल्याने हा निर्णय घेण्यात आला असून त्याचा लाभ अंत्योदय अन्न योजना व प्राधान्य कुटुंब योजना अंतर्गत येणाऱ्या सर्व लाभार्थ्यांना मिळणार आहे.

जिल्ह्यात अंत्योदय अन्न योजनेअंतर्गत सुमारे १ लाख ३५ हजार ७७५ कार्डधारक कुटुंबे आहेत. या कुटुंबांना दरमहा २१ किलो गहू व १४ किलो तांदूळ दिला जातो. मात्र सध्या हमीभावात खरेदी केलेल्या मक्याचा व ज्वारीचा साठा उपलब्ध असल्याने काही तालुक्यांमध्ये गव्हाच्या कोट्याबरोबर मका किंवा ज्वारीचेही वितरण करण्यात येणार आहे.

जिल्ह्यात २२ लाख ५५ हजार ४६ लाभार्थी
प्राधान्य कुटुंब योजनेअंतर्गत जिल्ह्यात २२ लाख ५५ हजार ४६ लाभार्थी आहेत. या लाभार्थ्यांना सदस्यसंख्येनुसार धान्य दिले जाते. त्यानुसार प्रति व्यक्ती तीन किलो गहू व दोन किलो तांदूळ वाटप केले जाते. यंदा या गव्हाबरोबरच काही ठिकाणी भरडधान्यांचाही समावेश करण्यात आला आहे.

लाभार्थ्यांना ज्वारी किंवा मक्याचे वितरण
जिल्ह्यातील जळगाव, बोदवड, रावेर, मुक्ताईनगर, पाचोरा, चाळीसगाव व चोपडा या तालुक्यांत लाभार्थ्यांना ज्वारी किंवा मक्याचे वितरण करण्यात येणार आहे. तर बोदवड व मुक्ताईनगर तालुक्यांमध्ये अंत्योदय कार्डधारकांना मार्च महिन्यात नियमितप्रमाणे गव्हाचेच वितरण केले जाणार आहे. जळगाव, धरणगाव, अमळनेर व पारोळा येथे मक्याचे वितरण होणार नसून तेथे गहू व ज्वारी देण्यात येणार आहे.

जामनेर तालुक्यात लाभार्थ्यांना ११ किलो गहू व १० किलो मका देण्यात येणार आहे. धरणगाव येथे प्रति व्यक्ती दोन किलो गहू व एक किलो ज्वारी, तर भुसावळ येथे दोन किलो गहू व एक किलो मका असे वितरण होणार आहे. उर्वरित तालुक्यांत प्रति लाभार्थी एक किलो गहू, एक किलो ज्वारी व एक किलो मका देण्यात येणार आहे.

”भरडधान्य खरेदी योजनेतून खरेदी करण्यात आलेली ज्वारी व मका ही स्वस्तधान्य दुकानांमार्फत वितरित केली जात आहेत. ज्या भागात ज्या प्रकारचे भरडधान्य खरेदी करण्यात आले आहे, त्याच भागात त्याचे वितरण करण्यात येत असल्याचे प्रशासनाने स्पष्ट केले आहे. लाभार्थ्यांनी आपल्या स्वस्तधान्य दुकानात आलेल्या कोट्यानुसार मका किंवा ज्वारीची उचल करावी”

– रुपेश ब्रिजेवार ,सहाय्यक जिल्हा पुरवठा अधिकारी