मिरवणुकीनंतर दगडफेक करून महिलांना अश्लील इशारे, शिवीगाळ करणाऱ्या टवाळखोरांवर गुन्हा

मिरवणुकीनंतर दगडफेक करून महिलांना अश्लील इशारे, शिवीगाळ करणाऱ्या टवाळखोरांवर गुन्हा

अमळनेर I शहरातील एका समाजच्या धार्मिक मिरवणुकीनंतर असामाजिक घटकांनी गोंधळ घालत महिलांना अश्लील इशारे व शिवीगाळ करून दगडफेक केल्याने खळबळ उडाली. ही घटना मंगळवारी (दि. ८) सायंकाळी साडे सहाच्या सुमारास घडली.याप्रकरणी आठ ते नऊ जणांविरुद्ध गुन्हा दाखल करण्यात आला आहे.

एका समाजाची मिरवणूक आटोपल्यानंतर काही टवाळखोरांनी एका परिसरातील महिलांना अश्लील शिवीगाळ करीत इशारे केले. इतकेच नव्हे तर दगडफेक करून वातावरण अस्थिर करण्याचा प्रयत्न केला. या दगडफेकीत एका महिलेच्या टाचेला दुखापत झाली. अचानक झालेल्या या प्रकारामुळे नफरीकांमध्ये गोंधळ उडून भीतीचे वातावरण निर्माण झाले.

सदर महिलांनी थेट पोलीस स्टेशन गाठून तक्रार नोंदवली. त्यानुसार भारतीय न्याय संहिता कलम ७९, २९६, ११५ (२), ३५१(२), ३५२, १८९(२), १९१ (२) अन्वये आठ ते नऊ जणांविरुद्ध गुन्हा दाखल करण्यात आला आहे. या प्रकरणाचा तपास पोलीस निरीक्षक दत्तात्रय निकम करीत आहेत.

दरम्यान, घटनेची माहिती मिळताच जिल्हा पोलीस अधीक्षक महेश्वर रेड्डी, अप्पर पोलीस अधीक्षक कविता नेरकर, उपविभागीय पोलीस अधिकारी विनायक कोते व शहर पोलीस निरीक्षक दत्तात्रय निकम यांनी तातडीने घटनास्थळी धाव घेतली. शहरात धार्मिक स्थळांवर अतिरिक्त बंदोबस्त ठेवण्यात आला असून सध्या तणावपूर्ण शांतता आहे