मुक्ताईनगरात बिबट्याचा थरार; मध्यवस्तीत शिरकावाने नागरिकांत भीती
विश्रामगृह परिसरात गोंधळ, आमदार चंद्रकांत पाटील घटनास्थळी दाखल
मुक्ताईनगर (प्रतिनिधी):- शहराच्या मध्यवस्तीत असलेल्या शासकीय विश्रामगृह परिसरात रविवारी सकाळी सुमारे ११ वाजता बिबट्याने अचानक शिरकाव केल्याने एकच खळबळ उडाली. बिबट्याच्या दर्शनाने नागरिकांमध्ये भीतीचे वातावरण निर्माण झाले असून, काही काळ परिसरात गोंधळाची परिस्थिती निर्माण झाली.
मिळालेल्या माहितीनुसार, विश्रामगृह परिसरात अचानक बिबट्या दिसताच ही बातमी वाऱ्यासारखी पसरली आणि बघ्यांची मोठी गर्दी जमली. घटनेची माहिती मिळताच पोलिसांनी तात्काळ घटनास्थळी धाव घेत परिस्थिती नियंत्रणात आणण्याचा प्रयत्न केला. तसेच वनविभागालाही पाचारण करण्यात आले.
दरम्यान, वनविभागाची हालचाल सुरू होताच बिबट्याने विश्रामगृहाच्या मैदानाच्या दिशेने धाव घेतली. या वेळी घाबरलेल्या नागरिकांनी त्याचा पाठलाग करण्याचा प्रयत्न केल्याने काही काळ तणाव निर्माण झाला. या गोंधळात बिबट्या जखमी झाल्याचेही दिसून आले.
घटनेची माहिती मिळताच आमदार चंद्रकांत पाटील यांनी घटनास्थळी भेट देत परिस्थितीचा आढावा घेतला. त्यांनी प्रशासन आणि वनविभागाला आवश्यक सूचना देत बिबट्याला सुरक्षितपणे जेरबंद करण्याचे निर्देश दिले.
जंगलातून थेट शहरात बिबट्या घुसल्याने मुक्ताईनगरवासीयांमध्ये दहशतीचे वातावरण असून, भविष्यात अशा घटना टाळण्यासाठी वनविभागाने शहरालगतच्या भागात गस्त वाढवावी, अशी मागणी नागरिकांकडून करण्यात येत आहे.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
