मुक्ताईनगर तालुक्यात महसूल विभागाची कारवाई; दोन डंपर आणि जेसीबी जप्त

मुक्ताईनगर तालुक्यात महसूल विभागाची कारवाई; दोन डंपर आणि जेसीबी जप्त

मुक्ताईनगर प्रतिनिधी | मुक्ताईनगर तालुक्यातील अंतुर्ली परिसरातील भोकरी भागात अवैधरित्या गौण खनिजाची वाहतूक सुरू असल्याची माहिती मिळताच महसूल विभागाने बुधवारी (१५ ऑक्टोबर) पहाटे पावणे चारच्या सुमारास मोठी कारवाई केली. या कारवाईदरम्यान दोन डंपर आणि एक जेसीबी मशीन जप्त करण्यात आली आहेत.

तहसीलदार गिरीश वखारे यांना रात्री अवैध खनिज वाहतुकीची गुप्त माहिती मिळाल्यानंतर त्यांनी तत्काळ नायब तहसीलदार, मंडळ अधिकारी, तलाठी आणि महसूल कर्मचारी यांचे पथक तयार केले. त्यानंतर पोलिसांच्या मदतीने छापा टाकण्यात आला. या वेळी अंतुरली आऊट पोस्टचे हवालदार व पोलीस कर्मचारी घटनास्थळी उपस्थित होते.

महसूल पथकाने घटनास्थळावरून दोन डंपर आणि जेसीबी मशीन ताब्यात घेतली असून, ही सर्व वाहने सध्या अंतुरली आऊट पोस्ट पोलिस ठाण्याच्या आवारात ठेवण्यात आली आहेत. जप्त करण्यात आलेल्या वाहनांपैकी एक डंपर आणि जेसीबी विजय दिनकर पाटील (रा. भोकरी, ता. मुक्ताईनगर) यांच्या मालकीची असल्याचे समोर आले आहे, तर दुसऱ्या डंपरवर क्रमांक नसल्याने त्याचे आरसी बुक महसूल विभागाने मागविले आहे.

या कारवाईमुळे भोकरी परिसरातील अवैध गौण खनिज उत्खनन आणि वाहतुकीवर आळा बसण्याची शक्यता आहे. महसूल विभागाने या प्रकरणाचा पुढील तपास सुरू केला आहे.