मेहरूण तलाव की ‘म्हशींचा इंटरनॅशनल स्विमिंग पूल’?

मेहरूण तलाव की ‘म्हशींचा इंटरनॅशनल स्विमिंग पूल’?

सांडपाणी, डुबक्या आणि प्रशासनाची मौनधारण; जळगावकरांचा उपरोधिक सवाल

जळगाव : शहराचा निसर्गवैभव म्हणून ओळखला जाणारा मेहरूण तलाव सध्या वेगळ्याच कारणाने चर्चेत आला आहे. ज्या तलावात कमळे फुलायला हवी होती, पक्ष्यांची किलबिल ऐकू यायला हवी होती, त्या तलावात आता म्हशींचे जलविहार रंगताना दिसत आहेत. परिणामी नागरिकांमध्ये संताप आणि उपरोधाची भावना व्यक्त होत आहे.

मराठी प्रतिष्ठानचे अध्यक्ष जमील देशपांडे यांनी या परिस्थितीवर उपरोधिक भाष्य करताना म्हटले की, “महानगरपालिकेने जणू काही ‘म्हैस कल्याणकारी योजना’च राबवली आहे. येथे ना मेंबरशिपची गरज, ना फी—फक्त डुबकी मारायची आणि मोकळं व्हायचं!” त्यांच्या या वक्तव्यामुळे प्रशासनाच्या दुर्लक्षावर पुन्हा एकदा प्रश्नचिन्ह उपस्थित झाले आहे.

आजूबाजूच्या वस्त्यांमधील सांडपाणी थेट तलावात मिसळत असल्याने पाण्याची गुणवत्ता खालावली आहे. नागरिक सकाळ-संध्याकाळ फिरण्यासाठी येथे येतात; मात्र त्यांना दिसते ते गढूळ पाणी आणि म्हशींचा मुक्त संचार. पर्यावरण संवर्धनाच्या घोषणा केल्या जात असल्या तरी प्रत्यक्ष कृतीचा अभाव जाणवत असल्याची टीका होत आहे.

तलावाचे मूळ सौंदर्य अबाधित ठेवण्यासाठी तातडीने स्वच्छता मोहीम राबवावी, सांडपाण्याचा प्रवाह रोखावा आणि तलाव परिसर संरक्षित क्षेत्र म्हणून विकसित करावा, अशी मागणी नागरिकांसह सामाजिक संघटनांकडून केली जात आहे. प्रशासनाने या प्रश्नाकडे गांभीर्याने लक्ष देऊन ठोस पावले उचलावीत, अशी अपेक्षा व्यक्त होत आहे.