मेहुणबारे येथे धर्मजागर सभा; डॉ. प्रवीण तोगडिया यांचे उद्योजकतेवर भर

मेहुणबारे येथे धर्मजागर सभा; डॉ. प्रवीण तोगडिया यांचे उद्योजकतेवर भर

चाळीसगाव : तालुक्यातील मेहुणबारे येथे राम मंदिर उभारणीनंतर आता देशाने रामराज्याच्या दिशेने वाटचाल करणे गरजेचे असून, तरुणांनी उद्योजकतेकडे वळावे, असे प्रतिपादन आंतरराष्ट्रीय हिंदू परिषदेचे संस्थापक अध्यक्ष डॉ. प्रवीण तोगडिया यांनी केले.
आंतरराष्ट्रीय हिंदू परिषद व राष्ट्रीय बजरंग दलाच्या वतीने संत तुकाराम बीज सभा मंडप परिसरात आयोजित धर्मजागर सभेत ते बोलत होते.
यावेळी त्यांनी शेतीमालावर प्रक्रिया उद्योग उभारण्याचे महत्त्व अधोरेखित केले. कच्च्या मालाचे तयार उत्पादनात रूपांतर करून विक्रीची साखळी उभारल्यास ग्रामीण भागातील तरुणांना रोजगाराच्या संधी निर्माण होतील, असे त्यांनी सांगितले. तसेच देशाच्या समतोल विकासासाठी ‘जनसंख्या नियंत्रण कायदा’ लागू करण्याची मागणीही त्यांनी यावेळी केली.सभेस १००८ महामंडलेश्वर परमेश्वरा नंदगिरी महाराज (मुंबई), विकास रेंगे (संघटन मंत्री, देवगिरी प्रांत), प्रवीण कोळी (जिल्हा मंत्री, जळगाव), राहुल चौधरी (जिल्हाध्यक्ष, जळगाव ग्रामीण), अविनाश कुलकर्णी (सहमंत्री, जळगाव जिल्हा) तसेच संदीप लांडगे यांची प्रमुख उपस्थिती होती.

कार्यक्रमाचे आयोजन तालुकाध्यक्ष संदीप लांडगे, समाधान पाटील, कैलास फौजी व संजय गढरी यांनी केले. सभेला मेहुणबारे व परिसरातील ग्रामस्थांसह राष्ट्रीय बजरंग दलाच्या कार्यकर्त्यांची मोठ्या संख्येने उपस्थिती होती.