मे महिन्यात जि.प. कर्मचाऱ्यांच्या बदल्या; ‘उचलबांगडी’ला वेग

मे महिन्यात जि.प. कर्मचाऱ्यांच्या बदल्या; ‘उचलबांगडी’ला वेग

जिल्हा व तालुकास्तरासाठी वेळापत्रक जाहीर; ठाण मांडलेल्या कर्मचाऱ्यांवर प्रशासनाची करडी नजर

जळगाव : जिल्हा परिषदेमधील वर्ग ३ व वर्ग ४ कर्मचाऱ्यांच्या सर्वसाधारण बदल्यांची प्रक्रिया यंदा मे महिन्यात राबविण्यात येणार असून, यासाठी सविस्तर वेळापत्रक जाहीर करण्यात आले आहे. जिल्हास्तरीय बदल्या ५ ते १५ मे दरम्यान, तर तालुकास्तरीय बदल्या १६ ते २५ मे दरम्यान पार पडणार आहेत. यामुळे अनेक वर्षे एकाच ठिकाणी कार्यरत असलेल्या कर्मचाऱ्यांच्या बदल्या होणार का, याकडे सर्वांचे लक्ष लागले आहे.

वेळापत्रक जाहीर; प्रक्रिया १२ एप्रिलपासून

जिल्हा परिषद प्रशासनाने बदल्यांसाठी १२ एप्रिलपासून प्रक्रिया सुरू करण्याचे निश्चित केले आहे. बीडीओंकडून संवर्गनिहाय वास्तविक ज्येष्ठता यादी संबंधित विभागप्रमुखांकडे सादर केली जाणार आहे. त्यानंतर १७ एप्रिल रोजी एकत्रित यादी प्रसिद्ध होईल, तर १८ ते २७ एप्रिलदरम्यान आक्षेप नोंदविण्याची संधी देण्यात येणार आहे. अंतिम यादी २ मे रोजी जाहीर होणार आहे.

जिल्हास्तरावर समुपदेशनाने बदल्या
अंतिम यादी जाहीर झाल्यानंतर ५ ते १५ मे दरम्यान जिल्हास्तरीय बदल्या समुपदेशनाच्या माध्यमातून पार पडणार आहेत. या प्रक्रियेत शिक्षक संवर्ग वगळून इतर कर्मचाऱ्यांचा समावेश असेल.

तालुकास्तरावरही हालचाली
तालुकास्तरीय बदल्यांची प्रक्रिया देखील १२ एप्रिलपासून सुरू होणार असून, १६ ते २५ मे दरम्यान प्रत्यक्ष बदल्या केल्या जाणार आहेत. या प्रक्रियेतही ज्येष्ठता याद्यांवर आक्षेप मागवून अंतिम यादीनुसार कार्यवाही होईल.

‘ठाण मांडलेल्या’ कर्मचाऱ्यांवर लक्ष
एकाच टेबलावर तीन वर्षांपेक्षा अधिक आणि एकाच विभागात पाच वर्षांपेक्षा जास्त काळ कार्यरत असलेल्या कर्मचाऱ्यांवर प्रशासनाची विशेष नजर राहणार आहे. अशा कर्मचाऱ्यांच्या बदल्यांना प्राधान्य दिले जाण्याची शक्यता आहे.

दिव्यांग कर्मचाऱ्यांसाठी विशेष तरतूद
दिव्यांग कर्मचाऱ्यांच्या बाबतीत शासनाच्या नियमानुसार युडीआयडी कार्ड व प्रमाणपत्रांची पडताळणी आवश्यक राहणार आहे. संबंधित कार्यालय प्रमुखांनी खात्री करूनच बदलीत सूट किंवा प्राधान्याबाबत निर्णय घ्यायचा आहे. या प्रक्रियेत काही त्रुटी आढळल्यास जबाबदारी संबंधित अधिकाऱ्यांवर राहणार आहे.

प्रशासनाची तयारी पूर्ण
दरवर्षीप्रमाणे यंदाही मे महिन्यात होणाऱ्या बदल्यांसाठी प्रशासनाने तयारी सुरू केली असून, पारदर्शक आणि नियमबद्ध पद्धतीने प्रक्रिया पार पाडण्याचा प्रयत्न केला जाणार आहे.