मोटारसायकल चोरीच्या गुन्ह्यात मध्य प्रदेशातील चोरट्याला ठोकल्या बेड्या

मोटारसायकल चोरीच्या गुन्ह्यात मध्य प्रदेशातील चोरट्याला ठोकल्या बेड्या

जळगाव: जळगाव शहरातील मोटारसायकल चोरीच्या एका गुन्ह्यात जिल्हापेठ पोलिसांनी मध्यप्रदेशातील एका आरोपीला अटक केली आहे. पोलिसांनी आरोपीकडून चोरीला गेलेली मोटारसायकलही जप्त केली आहे.

जिल्हापेठ पोलीस स्टेशनमध्ये ३१ ऑगस्ट २०२५ रोजी मोटारसायकल चोरीचा गुन्हा दाखल करण्यात आला होता. या गुन्ह्याचा तपास करत असताना, गुन्हे शोध पथकाला एका संशयित व्यक्तीबद्दल गुप्त माहिती मिळाली. विनेश बरडे नावाचा हा संशयित सध्या कुसुंबा येथील चिंचोली परिसरात राहत असून, तो डी-मार्टजवळ उभा असल्याची माहिती मिळाली.

माहिती मिळताच, पोलिसांनी तात्काळ डी-मार्टजवळ जाऊन तपास केला. दिलेल्या वर्णनानुसार, संशयित व्यक्ती मिळून आल्याने त्याला ताब्यात घेण्यात आले. चौकशीदरम्यान त्याने आपले नाव विनेश चंपालाल बरडे (वय ३०, रा. अंजनगाव, ता. सेंधवा, जि. बडवाणी, मध्यप्रदेश) असे सांगितले. त्यानंतर तपास अधिकारी शरीफ शेख यांनी त्याला अटक केली.

न्यायालयाने आरोपीला दोन दिवसांची पोलीस कोठडी सुनावल्यानंतर पोलिसांनी त्याच्याकडून चोरीला गेलेली मोटारसायकल हस्तगत केली. ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे आणि पोलीस निरीक्षक प्रदीप ठाकूर यांच्या मार्गदर्शनाखाली करण्यात आली.

या कारवाईमध्ये पोलीस हवालदार महेश महाजन, नरेश सोनवणे, शरीफ शेख, तेजस मराठे, अमितकुमार मराठे, प्रशांत सैदाणे, विकास पहुरकर, आणि प्रशांत लाड यांचा सहभाग होता.