मोबाईल-पैशांच्या वादातून तरुणाची निर्घृण हत्या; आरोपीला अटक

मोबाईल-पैशांच्या वादातून तरुणाची निर्घृण हत्या; आरोपीला अटक

बांभोरी शिवारात धक्कादायक घटना; पत्नीवरही हल्ला

धरणगाव (प्रतिनिधी)
मोबाईल आणि पैशांच्या वादातून ३५ वर्षीय तरुणाची चाकू, काठी आणि दगडाने ठेचून निर्घृण हत्या केल्याची धक्कादायक घटना बांभोरी शिवारात घडली. या प्रकरणी धरणगाव पोलिसांनी संशयित आरोपीला अटक केली असून परिसरात मोठी खळबळ उडाली आहे.

वादातून हाणामारी; जीवघेणा हल्ला
पिंटू अमशा बारेला (वय ३५, मूळ रा. वरला, जि. बडवानी, सध्या रा. बांभोरी शिवार) आणि संशयित आरोपी सुनील सिताराम बारेला यांच्यात मोबाईल व पैशांच्या देवाणघेवाणीवरून वाद झाला होता. वादाचे रूपांतर हाणामारीत झाले आणि आरोपीने संतापाच्या भरात पिंटूवर जीवघेणा हल्ला चढवला.

रेल्वे पुलाजवळ हत्या; जागीच मृत्यू
२२ मार्च रोजी दुपारी दीड वाजेच्या सुमारास बांभोरी शिवारातील रेल्वे लाईनजवळील पुलाच्या बोगद्यात आणि लिंबाच्या झाडाखाली आरोपीने चाकू, काठी व दगडाने बेदम मारहाण केली. या गंभीर मारहाणीत पिंटू बारेला यांचा जागीच मृत्यू झाला.

पत्नीवरही हल्ला; साक्षीदाराला धमकी
भांडण सोडवण्यासाठी गेलेल्या मृताच्या पत्नी सखूबाई बारेला यांचा आरोपीने हात पिरगळून चापटबुक्क्यांनी मारहाण केली. साक्षीदार कैलास बारेला यालाही धमकावण्यात आले. या प्रकरणी सखूबाई बारेला यांनी धरणगाव पोलीस ठाण्यात फिर्याद दाखल केली आहे.

पोलिसांची तात्काळ कारवाई; आरोपी जेरबंद
घटनेची माहिती मिळताच उपविभागीय पोलीस अधिकारी अण्णासाहेब घोलप आणि पोलीस निरीक्षक सुनील पवार यांनी घटनास्थळी भेट देत पाहणी केली. धरणगाव पोलिसांनी गुन्हा दाखल करून तपास सुरू केला.

तपास सुरू; आरोपी अटकेत
सहाय्यक पोलीस निरीक्षक प्रशांत कंडारे यांच्या मार्गदर्शनाखाली तपास सुरू असून, पोलिसांनी तत्पर कारवाई करत संशयित आरोपी सुनील सिताराम बारेला याला २३ मार्च रोजी रात्री ९:२४ वाजता अटक केली आहे. पुढील तपास सुरू आहे.