यावलमध्ये तरुणाची निर्घृण हत्या; दोन आरोपींनी स्वतःहून पोलिसांत दिली कबुली

यावलमध्ये तरुणाची निर्घृण हत्या; दोन आरोपींनी स्वतःहून पोलिसांत दिली कबुली

यावल: यावल तालुक्यातील विरावली-दहिगाव रस्त्यावर एका २१ वर्षीय तरुणाची निर्घृण हत्या झाल्याने जिल्ह्यात खळबळ उडाली आहे. विशेष म्हणजे, खून केल्यानंतर अवघ्या काही तासांतच दोन संशयित आरोपी स्वतः मोटारसायकलवरून पोलीस ठाण्यात हजर झाले आणि त्यांनी गुन्ह्याची कबुली दिली.

मृत तरुणाचे नाव इम्रान युनूस पटेल (वय २१) असे असून, तो मूळचा धरणगाव तालुक्यातील हनुमंतखेडा येथील रहिवासी होता. सध्या तो दहिगाव येथे मामाकडे राहत होता. गुरुवारी रात्री गावाजवळ विरावली-दहिगाव रस्त्यावर त्याच्यावर जीवघेणा हल्ला करण्यात आला, ज्यात त्याचा मृत्यू झाला.

या घटनेनंतर, त्याच रात्री ज्ञानेश्वर गजानन पाटील (वय १९) आणि गजानन रवींद्र कोळी (वय १९) या दोन तरुणांनी स्वतः यावल पोलीस ठाण्यात हजर होत आपणच हा खून केल्याची कबुली दिली. पोलिसांनी तातडीने त्यांना ताब्यात घेतले असून पुढील तपास सुरू केला आहे.

गेल्या काही दिवसांपासून जळगाव जिल्ह्यात खुनाच्या घटनांमध्ये वाढ झाल्याने कायदा व सुव्यवस्थेवर प्रश्नचिन्ह निर्माण झाले आहे. नुकत्याच जामनेर तालुक्यात झालेल्या खुनानंतर पुन्हा एकदा या जीवघेण्या घटनेने नागरिकांमध्ये भीतीचे वातावरण आहे.