यावल येथे महामार्गावर झालेला दरोडा उघडकीस

यावल येथे महामार्गावर झालेला दरोडा उघडकीस
दोन आरोपी अटकेत, रोकड आणि कागदपत्रे हस्तगत

जळगाव प्रतिनिधी – रावेर ते चोपडा राष्ट्रीय महामार्गावरील यावल शहरातील बुरुज चौकाजवळ १७ ऑगस्ट रोजी मध्यरात्री दरोड्याची धक्कादायक घटना घडली. दुचाकीवरून आलेल्या दोन अज्ञात दरोडेखोरांनी पिकअप चालकास जीवे ठार मारण्याची धमकी देत त्याच्याकडून रोकड रक्कम व महत्त्वाची कागदपत्रे लुटून नेली. पोलिसांच्या तातडीच्या तपासामुळे अवघ्या काही दिवसांत दोन्ही आरोपींचा शोध घेऊन त्यांना अटक करण्यात आली आहे.

दरोड्याची थरारक घटना

चोपड्यातील रोहित प्रकाश रल (वय २४) हे आपल्या महिंद्रा पिकअप वाहनातून प्रवास करत असताना यावलजवळ रात्री सुमारास दोन अज्ञात इसमांनी त्यांची गाडी थांबवली. चालकाला मारहाण करून गाडीच्या डॅशबोर्डमधील पिशवीतील पाच हजार रुपये रोख रक्कम व कागदपत्रे जबरदस्तीने लुटली. घटनेनंतर तात्काळ यावल पोलीस ठाण्यात गुन्हा दाखल करण्यात आला.

गंभीर स्वरूपाचा हा गुन्हा लक्षात घेऊन पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी अनिल बडगुजर यांनी तातडीच्या सूचना देत तपासाची गती वाढवली. गोपनीय माहिती आणि स्थानिकांच्या मदतीने तपास करत अखेर दोन आरोपींचा शोध लागला.

या गुन्ह्यात समशेर शहा सलीम शहा (वय २७, रा. यावल) आणि त्याचा साथीदार समीर रहेमान तडवी (वय २२, रा. यावल) सहभागी असल्याचे निष्पन्न झाले. पोलिसांनी समशेर शहा यास जळगाव येथील गेंदालाल मिल परिसरातून तर त्याचा साथीदार समीर तडवी यास यावल येथून अटक केली. आरोपींकडून लुटलेली पाच हजार रुपये रोकड हस्तगत करण्यात आली आहे. मुख्य आरोपी समशेर शहा हा सराईत गुन्हेगार असून त्याच्यावर भुसावळ रेल्वे तसेच जळगाव शहरातील बाजारपेठ पोलिस ठाण्यात चोरी, जबरी चोरी, घरफोडी व विनयभंगाचे गुन्हे दाखल आहेत.

यशस्वी कारवाई करणारे पथक

या कारवाईत पोलीस निरीक्षक रंगनाथ धारबळे यांच्या नेतृत्वाखाली सहाय्यक फौजदार विजय पाचपोळे, पोलीस हवालदार वासुदेव मराठे, निलेश चौधरी, पोलीस नाईक अमित तडवी, पोलीस कॉन्स्टेबल अर्षद गवळी, ऐजाज गवळी, अनिल साळुंखे आणि सागर कोळी यांनी सहभाग घेतला. पुढील तपास पोलिसांकडून सुरू आहे.