राजकारणात उज्ज्वल निकम यांची नवी इनिंग: राज्यसभेची संधी, केंद्रात मंत्रिपदाची जोरदार चर्चा

जळगाव: ज्येष्ठ विधिज्ञ आणि देशपातळीवरील अनेक गाजलेल्या खटल्यांमध्ये सरकारी वकील म्हणून ओळखले जाणारे ॲड. उज्ज्वल निकम यांची राष्ट्रपती नामनिर्देशित खासदार म्हणून राज्यसभेवर नियुक्ती करण्यात आली आहे. त्यांच्या या नियुक्तीमुळे आता जळगाव जिल्ह्याचे तीन प्रतिनिधी संसदेत सहभागी होणार आहेत. विशेष म्हणजे, ॲड. निकम यांना केंद्रीय मंत्रिमंडळातही स्थान मिळण्याची शक्यता वर्तवली जात आहे, ज्यामुळे जळगाव जिल्ह्याच्या राजकीय वर्तुळात उत्साहाचे वातावरण आहे.

रावेरच्या खासदार रक्षा खडसे या आधीच केंद्रात राज्यमंत्री असताना, आता ॲड. निकम यांनाही मंत्रिपद दिले जाण्याची जोरदार चर्चा राजकीय वर्तुळात सुरू आहे. कायदेविषयक प्रदीर्घ पार्श्वभूमी असलेल्या ॲड. निकम यांनी आपले वडील बॅरिस्टर निकम यांच्याकडून मिळालेला वकिलीचा वारसा समर्थपणे पुढे नेला आहे. त्यांनी अजमल कसाब खटला, २६/११ मुंबई हल्ला आणि अनेक प्रसिद्ध बलात्कार प्रकरणांसह अनेक गंभीर गुन्हेगारी प्रकरणांमध्ये यशस्वी भूमिका बजावली आहे. काही वर्षांपूर्वी राष्ट्रवादी काँग्रेसने त्यांना राजकारणात येण्यासाठी विचारले होते, परंतु त्यांनी ती संधी नाकारली होती.

भाजपने मात्र त्यांच्या अनुभवाची दखल घेत त्यांना आपल्या पक्षात स्थान दिले आणि मागील लोकसभा निवडणुकीत उत्तर-मध्य मुंबई मतदारसंघातून उमेदवारी दिली होती. निवडणुकीत यश न मिळाल्यानंतरही पक्षाने त्यांच्या कायदेविषयक जाणकारीला महत्त्व देत राज्यसभेत संधी दिली आहे. त्यांच्या या नियुक्तीमुळे संसदीय चर्चेत गुणवत्ता वाढेल, असा सरकारचा हेतू असल्याचे सांगितले जात आहे.

दरम्यान, ॲड. निकम यांच्या मंत्रिपदाच्या शक्यतेवर भाजप नेते आणि राज्याचे मंत्री गिरीश महाजन यांनी सूचक प्रतिक्रिया दिली आहे. “निकम यांच्यासारख्या व्यक्तीला राज्यसभेत पाठवताना काही निश्चित विचार केला गेला आहे. त्यांच्या मंत्रिपदाच्या चर्चेमध्ये काही तथ्य आहे,” असे महाजन यांनी म्हटले आहे.

जर ॲड. निकम यांना केंद्रात मंत्रिपद मिळाले, तर जळगाव जिल्ह्याचे दोन खासदार केंद्र सरकारमध्ये मंत्रीपदी असतील. याशिवाय, राज्यात मंत्री गिरीश महाजन, गुलाबराव पाटील आणि आमदार चंद्रकांत पाटील यांच्यासह एकूण पाच मंत्री जळगाव जिल्ह्यातून असतील. त्यामुळे जिल्ह्याच्या राजकीय ताकदीत मोठी भर पडणार असल्याचे राजकीय विश्लेषकांचे मत आहे.