राज्यस्तरीय संगीत नाट्य स्पर्धेत ‘संगीत समर्पण’चा ठसा

राज्यस्तरीय संगीत नाट्य स्पर्धेत ‘संगीत समर्पण’चा ठसा

जळगावच्या स्व. वसंतराव चांदोरकर स्मृती प्रतिष्ठानला चार पारितोषिके

जळगाव : प्रतिनिधी – ६४ व्या महाराष्ट्र राज्य संगीतसूर्य केशवराव भोसले संगीत नाट्य स्पर्धेच्या अंतिम फेरीत जळगावच्या स्व. वसंतराव चांदोरकर स्मृती प्रतिष्ठानने सादर केलेल्या ‘संगीत समर्पण’ या नाटकाने चार पारितोषिके पटकावत आपली कलात्मक छाप उमटवली आहे. सांगली येथे झालेल्या अंतिम फेरीत या नाटकातील अभिनय, गायन, वेशभूषा आणि लिखाण या विभागांमध्ये कलाकारांना गौरव मिळाला.
या स्पर्धेत नाटकाचे लेखक मकरंद देशमुख यांना लिखाणासाठी तृतीय पारितोषिक मिळाले. तर सौ. प्राची चौधरी (सत्यभामा) यांना अभिनयासाठी गुणवत्ता प्रमाणपत्र, कु. मयुरी हरीमकर (रुक्मिणी) हिला गायनासाठी गुणवत्ता प्रमाणपत्र आणि सौ. नुपूर चांदोरकर-खटावकर यांना उत्कृष्ट वेशभूषेसाठी प्रथम पारितोषिक प्रदान करण्यात आले.
मकरंद देशमुख लिखित आणि चिंतामण पाटील दिग्दर्शित या नाटकाची निर्मिती खान्देश नाट्य प्रतिष्ठान, जळगाव यांनी केली आहे. नाटकात भूषण खैरनार (सूत्रधार व कृष्ण), कु. मयुरी हरीमकर (नटी-१ व रुक्मिणी), सौ. प्राची चौधरी (नटी-२ व सत्यभामा), संजय कुलकर्णी (नारद), कु. स्वाती डहाळे (राधा) आणि कुमार राम चौधरी (बालकृष्ण) यांनी भूमिका साकारल्या.
नाटकाच्या सादरीकरणाला साथसंगत देताना राजेंद्र माने (संवादिनी), भूषण गुरव (तबला), दर्शन गुजराथी (पखवाज, ढोलकी) आणि राजेश पुराणिक (टाळ) यांनी संगीताची जबाबदारी सांभाळली. तांत्रिक बाजूंत शरद भालेराव (नेपथ्य), पीयूष रावळ (प्रकाशयोजना), प्रबुद्ध भालेराव (पार्श्वसंगीत), सौ. मीनाक्षी पाटील (रंगभूषा) आणि सौ. नुपूर चांदोरकर-खटावकर (वेशभूषा) यांनी महत्त्वाची भूमिका बजावली. रंगमंच व्यवस्थापनाची जबाबदारी सौ. मधुवंती देशमुख आणि सौ. रेणुका जोशी यांनी पार पाडली.
या उल्लेखनीय यशाबद्दल जळगावच्या नाट्यप्रेमींनी संपूर्ण कलाकार आणि तांत्रिक पथकाचे कौतुक केले असून शहरातील सांस्कृतिक क्षेत्रासाठी ही अभिमानाची बाब ठरत आहे.