रावेरमध्ये ‘कोंबिंग ऑपरेशन’ची धडक; दुचाकी चोरटे जेरबंद

रावेरमध्ये ‘कोंबिंग ऑपरेशन’ची धडक; दुचाकी चोरटे जेरबंद

नाकाबंदीत चोरीच्या दोन मोटारसायकली जप्त; जुगार, गांजा व अवैध दारूवरही कारवाई

रावेर (प्रतिनिधी) जळगाव जिल्हा पोलीस अधीक्षकांच्या आदेशानुसार रावेर शहरात राबविण्यात आलेल्या ‘कोंबिंग ऑपरेशन’ आणि नाकाबंदी दरम्यान पोलिसांनी दोन सराईत दुचाकी चोरट्यांना अटक केली आहे. या कारवाईत चोरीच्या दोन मोटारसायकलींसह जुगार, अंमली पदार्थ सेवन आणि अवैध दारू विक्री करणाऱ्यांवरही गुन्हे दाखल करण्यात आले आहेत.
नागझीरी वाडा येथील अब्दुल रफीक अब्दुल कादर (वय ५२) हे दि. २३ मार्च २०२६ रोजी रावेर शहरातील लतिफ हॉल येथे एका लग्नसमारंभासाठी गेले होते. लग्न आटोपून बाहेर आल्यावर त्यांची काळ्या रंगाची होंडा युनिकॉन (MH-19-DW-4895) चोरीला गेल्याचे त्यांच्या निदर्शनास आले. याप्रकरणी रावेर पोलीस स्टेशनमध्ये चोरीचा गुन्हा दाखल करण्यात आला होता. शहरातील ९५ सीसीटीव्ही कॅमेऱ्यांचे फुटेज तपासूनही आरोपींचा सुगावा लागत नव्हता.

मात्र, रात्री राबविलेल्या कोंबिंग ऑपरेशन दरम्यान डॉ. बाबासाहेब आंबेडकर चौकात नाकाबंदी सुरू असताना दोन संशयित तरुण दुचाकीसह आढळून आले. पोलिसांनी कागदपत्रांची मागणी केली असता त्यांनी उडवाउडवीची उत्तरे दिली. कडक चौकशी केली असता त्यांनी लतिफ हॉल येथून दुचाकी चोरल्याची कबुली दिली.
आमिर खान अजमल खान उर्फ जुनेद (वय १९, रा. खर्णीपुरा, ता. यावल) आणि रोहित अशोक बिन्हाडे (वय १८, रा. सिद्धार्थ नगर, यावल) यांना अटक करण्यात आली आहे.

कोंबिंग ऑपरेशन दरम्यान पोलिसांनी इतरही अनेक कारवाया केल्या. चार जुगार अड्ड्यांवर छापे टाकून महाराष्ट्र जुगार प्रतिबंधक अधिनियमांतर्गत कारवाई करण्यात आली. सार्वजनिक ठिकाणी गांजाचे सेवन करणाऱ्या तीन जणांवर एनडीपीएस कायद्यान्वये कारवाई झाली. तसेच गावठी दारू विक्री करणाऱ्या दोन जणांवर दारूबंदी कायद्यानुसार गुन्हा दाखल करण्यात आला.

ही धडक कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी अनिल बडगुजर यांच्या मार्गदर्शनाखाली पार पडली. यात रावेरचे पोलीस निरीक्षक डॉ. विशाल जयस्वाल, पीएसआय सुनील मोरे, तुषार पाटील तसेच गुन्हे शोध पथकातील कर्मचाऱ्यांचा सहभाग होता.