रावेर तालुक्यात वनविभागाची अवैध डिंक तस्करीविरोधात धडक कारवाई

रावेर तालुक्यात वनविभागाची अवैध डिंक तस्करीविरोधात धडक कारवाई

धडक कारवाईमुळे परिसरात खळबळ

 

रावेर प्रतिनिधी – रावेर तालुक्यातील अहिरवाडी आणि जुनोना परिसरात वनविभागाने अवैध डिंक तस्करीविरोधात मोठी कारवाई केली आहे. तीन वेगवेगळ्या कारवायांमध्ये एकूण १६५ किलो सालई आणि धावडा डिंक जप्त करण्यात आला आहे. या कारवाईत दोन दुचाकींसह एकूण ७२,९५० रुपये किमतीचा मुद्देमाल हस्तगत करण्यात आला आहे. वनविभागाच्या या धडक कारवाईमुळे परिसरात खळबळ उडाली असून, अवैध तस्करांचे धाबे दणाणले आहेत.

पहिली कारवाई: अहिरवाडी वनक्षेत्र

वनविभागाला मिळालेल्या गुप्त माहितीच्या आधारे अहिरवाडी वनक्षेत्रातील कं. नं. ५ मध्ये गस्त घालत असताना एक व्यक्ती मोटरसायकलवरून गोण्या घेऊन जाताना दिसला. गाडीची तपासणी केली असता, त्याच्याकडे ९८ किलो सालई डिंक सापडला. या डिंकाची किंमत १०,७८० रुपये असून, (एमएच १९ एजी १७२३) क्रमांकाची १५,००० रुपये किंमतीची दुचाकी असा मुद्देमाल जप्त करण्यात आला आहे.

दुसरी कारवाई: जुनोना कं. नं. ८

जुनोना येथील कं. नं. ८ मध्ये गस्तीदरम्यान एक व्यक्ती मोटरसायकलवरून गोण्या घेऊन जाताना दिसला. पाठलाग केला असता, आरोपीने एक गोणी फेकून पळ काढला. या गोणीत ४७ किलो सालई डिंक मिळून आला, ज्याची किंमत ५,००० रुपये आहे.

तिसरी कारवाई: जुनोना कं. नं. ७

जुनोना येथील कं. नं. ७ मध्ये गस्त घालत असताना एक व्यक्ती मोटरसायकलवरून डिंक घेऊन जाताना दिसला. वन अधिकाऱ्यांनी पाठलाग केला असता, तो गाडी आणि माल सोडून पसार झाला. या कारवाईत (एमपी १० बीए १४६९) दुचाकी आणि ४,००० रुपये किंमतीचा डिंक असा मुद्देमाल जप्त करण्यात आला आहे.

एकूण जप्त मुद्देमाल

या तीन कारवायांमध्ये एकूण १६५ किलो डिंक आणि दोन मोटरसायकली जप्त करण्यात आल्या असून, जप्त केलेल्या मालाची एकूण किंमत ७२,९५० रुपये आहे. तस्करांविरुद्ध कायदेशीर कारवाई करून संपूर्ण मुद्देमाल आगरडेपो, रावेर येथे जमा करण्यात आला आहे.

कारवाई करणारे अधिकारी आणि कर्मचारी

ही कारवाई निनू सोमराज (वनसंरक्षक, धुळे प्रा. वनवृत्त), जमीर शेख (उपवनसंरक्षक, यावल वनविभाग), आर. आर. सदगीर (विभागीय वन अधिकारी दक्षता, धुळे), प्रथमेश हडपे (सहा. वनसंरक्षक, चोपडा), समाधान पाटील (सहा. वनसंरक्षक, यावल) यांच्या मार्गदर्शनाखाली करण्यात आली. वनपरिक्षेत्र अधिकारी अजय बावणे, वनरक्षक जगदीश जगदाळे, आयेशा पिंजारी, सविता वाघ, वनमजूर सुभाष माळी, इनुस तडवी, विनोद पाटील यांनी ही धडक कारवाई यशस्वीपणे पार पाडली.

वनविभागाच्या या धडक कारवाईमुळे अवैध तस्करीवर आळा बसण्याची अपेक्षा आहे.