राष्ट्रीय महामार्ग ६ भूसंपादनात तब्बल १६.९७ लाखांची फसवणूक

राष्ट्रीय महामार्ग ६ भूसंपादनात तब्बल १६.९७ लाखांची फसवणूक

नावसाम्याचा फायदा घेत ५८ वर्षीय महिलेची बनावट कागदपत्रे सादर करून लूट

जळगाव – राष्ट्रीय महामार्ग ६ च्या चौपदरीकरणासाठी करण्यात आलेल्या भूसंपादनात मिळणाऱ्या मोबदल्यावर डोळा ठेवत एका ५८ वर्षीय महिलेने नावाचे साम्य साधून शासनाची तब्बल १६ लाख ९७ हजार रुपयांची फसवणूक केल्याचा धक्कादायक प्रकार उघडकीस आला आहे. नायब तहसीलदार विकास लाडवंजारी यांनी दिलेल्या तक्रारीनंतर जिल्हापेठ पोलिस ठाण्यात संशयित पुष्पा देवराम जावळे (वय ५८, रा. अंबिका सोसायटी, धुळे) यांच्या विरोधात गुन्हा दाखल करण्यात आला आहे.

जळगाव तालुक्यातील नशिराबाद येथील गट क्रमांक २२०६ मधील ४८८ चौ.मी. जमीन ही मूळ मालक पुष्पा देवराम जावळे (वय ७०, रा. भुसावळ) यांच्या नावावर होती. २०११ आणि २०१३ मध्ये चौपदरीकरणासाठी भूसंपादन झाले असताना त्यांना १६.९७ लाख रुपयांचा मोबदला मिळणे अपेक्षित होते. मात्र दि. २१ ऑगस्ट २०१८ रोजी धुळे येथील त्याच नावाच्या महिलेने उपविभागीय अधिकारी कार्यालयात स्वतःला जमीनमालक भासवत मोबदला मिळविण्यासाठी अर्ज दाखल केला.

मूळ मालकाच्या अर्जानंतर उघड झाला घोटाळा

दि. २८ ऑगस्ट २०१९ रोजी मूळ मालकांनी भूसंपादन मोबदल्यासाठी अर्ज दाखल केला तेव्हा ही संशयास्पद बाब प्रशासनाच्या लक्षात आली. त्यानंतर तत्कालीन उपविभागीय अधिकारी दिपमाला चौरे यांनी चौकशी सुरू केली. पडताळणीत धुळे येथील महिलेने सादर केलेली कागदपत्रे खोटी असल्याचे स्पष्ट झाले. ती जमीनमालक नसतानाही तिने नावसाम्याचा फायदा घेऊन बनावट कागदपत्रे सादर केली होती.

खोट्या खात्यावर मोबदला वर्ग; प्रशासनाला मिळत नव्हती माहिती

२३ ऑगस्ट २०१८ रोजी या तोतया महिलेच्या अॅक्सिस बँक खात्यात आरटीजीएसद्वारे १६ लाख ९७ हजार रुपये जमा करण्यात आले होते. त्यानंतर प्रशासनाने संबंधित महिलेचा पत्ता शोधण्यासाठी बँकेसह विविध मार्गांनी चौकशी केली; मात्र ती निष्पन्न झाली नाही. अखेरीस जिल्हाधिकाऱ्यांच्या आदेशानुसार नायब तहसीलदार यांनी धुळे येथील बनावट लाभार्थीविरोधात गुन्हा नोंदवला.

नावांचे साम्य – आणि लाखोंचा गंडा

साम्य असलेल्या नावाचा गैरफायदा घेत मूळ मालकाच्या जागेच्या मोबदल्यावर हक्क सांगत ही फसवणूक केली गेली. एका स्वाक्षरीने, बनावट कागदपत्रांनी आणि खोट्या खात्याद्वारे लाखो रुपये हस्तगत करण्याचा हा प्रकार उघड होताच प्रशासनात आणि परिसरात एकच खळबळ उडाली आहे. पुढील तपास जिल्हापेठ पोलीस करत आहेत.