रुग्णसेवा हीच ईश्वर सेवा; शामखेडा येथे मोफत मोतीबिंदू शस्त्रक्रिया शिबिर

रुग्णसेवा हीच ईश्वर सेवा; शामखेडा येथे मोफत मोतीबिंदू शस्त्रक्रिया शिबिर

जीपीएस परिवार व मुक्ती फाउंडेशनचा उपक्रम; अनेक रुग्णांना उपचारांचा लाभ

जळगाव | प्रतिनिधी : जळगाव ग्रामीण मतदारसंघातील शामखेडा येथे शिवसेना शाखेच्या माध्यमातून जीपीएस परिवार आणि मुक्ती फाउंडेशन यांच्या संयुक्त विद्यमाने विशेष आरोग्य शिबिराचे आयोजन करण्यात आले. युवा नेतृत्व तथा माजी जिल्हा परिषद सदस्य प्रतापराव गुलाबराव पाटील यांच्या मार्गदर्शनाखाली हे शिबिर पार पडले.

या आरोग्य शिबिरात हृदयरोग, रक्तदाब, मधुमेह, ऑक्सिजन पातळी तपासणी, सामान्य आरोग्य तपासणी तसेच मोतीबिंदू तपासणी आदी विविध सेवा नागरिकांसाठी उपलब्ध करून देण्यात आल्या. गावातील तसेच परिसरातील नागरिकांनी मोठ्या संख्येने उपस्थित राहून तपासणी, वैद्यकीय मार्गदर्शन व औषधोपचाराचा लाभ घेतला.

शिबिरात तपासणी झालेल्या अनेक रुग्णांच्या मोतीबिंदू शस्त्रक्रिया जिल्हा सामान्य रुग्णालय, जळगाव येथील नेत्र विभागात नेत्रतज्ञ डॉ. प्रवीण पाटील यांच्या मार्गदर्शनाखाली यशस्वीरित्या पार पडल्या. शस्त्रक्रियेनंतर संबंधित रुग्णांना चष्मे व औषधांचे वाटप करून त्यांना सुटी देण्यात आली. शस्त्रक्रिया झालेल्या ज्येष्ठ नागरिकांनी महाराष्ट्राचे पाणीपुरवठा व स्वच्छता मंत्री तथा पालकमंत्री गुलाबराव पाटील आणि युवा नेतृत्व प्रतापराव पाटील यांच्या समाजाभिमुख उपक्रमांचे कौतुक केले.

या शिबिराच्या यशस्वी आयोजनासाठी मुक्ती फाउंडेशनचे मुकुंद गोसावी, शामखेडा शिवसेना शाखा प्रमुख गणेश भिगाने, पदाधिकारी, शिवसैनिक तसेच ग्रामस्थांचे मोलाचे सहकार्य लाभले. तसेच नेत्र चिकित्सा अधिकारी तुषार जोशी, दिलीप कुमावत आणि आरोग्य विभागातील अधिकारी व कर्मचाऱ्यांनीही सक्रिय सहभाग नोंदविला. या उपक्रमामुळे परिसरातील गरजू रुग्णांना वेळेवर उपचार मिळाल्याने ग्रामस्थांनी समाधान व्यक्त केले.