वडगावपान ऍसिड हल्ल्याचा सुवर्णकार समाजाकडून तीव्र निषेध

वडगावपान ऍसिड हल्ल्याचा सुवर्णकार समाजाकडून तीव्र निषेध

आरोपीला तात्काळ अटक व कठोर शिक्षेची मागणी; जिल्हाधिकाऱ्यांना निवेदन

जळगाव (प्रतिनिधी) – वडगावपान (ता. संगमनेर, जि. अहिल्यानगर) येथे शाळकरी मुलीवर झालेल्या ऍसिड हल्ल्याच्या निषेधार्थ जळगाव येथील सुवर्णकार समाज आक्रमक झाला असून, श्री संत नरहरी महाराज लाड सुवर्णकार मंडळ व समस्त सुवर्णकार समाजाच्या वतीने जिल्हाधिकाऱ्यांना निवेदन सादर करण्यात आले.
वडगावपान येथील १३ वर्षीय कुमारी ईश्वरी संजय डहाळे या सहावीतील विद्यार्थिनीवर झालेल्या अमानुष ऍसिड हल्ल्यामुळे समाजात तीव्र संतापाची लाट उसळली आहे. या घटनेचा तीव्र निषेध नोंदवत संबंधित आरोपीला तात्काळ अटक करून कठोर शिक्षा देण्यात यावी, अशी मागणी निवेदनाद्वारे करण्यात आली.
तसेच सदर प्रकरण फास्ट ट्रॅक न्यायालयात चालवून पीडित मुलीला शासनाकडून तातडीची आर्थिक मदत द्यावी, भविष्यात अशा घटना टाळण्यासाठी ठोस उपाययोजना कराव्यात आणि ऍसिडसारख्या रासायनिक पदार्थांच्या विक्रीवर कडक निर्बंध आणावेत, अशा मागण्याही यावेळी करण्यात आल्या.
या निवेदनावेळी सुवर्णकार समाजाचे अध्यक्ष विजय सोनार, माजी अध्यक्ष सुनील दिगंबर कपोते, महिला अध्यक्षा सौ. उषाताई सोनार, युवा अध्यक्ष दिपक सोनार यांच्यासह समाजातील सदस्य व ज्येष्ठ नागरिक मोठ्या संख्येने उपस्थित होते.