वडती येथे पूज्य साने गुरुजी जयंती उत्साहात साजरी

वडती येथे पूज्य साने गुरुजी जयंती उत्साहात साजरी

रोप्य महोत्सवी वर्षाची सांगता; “चला साने गुरुजी होऊ” या विषयावर प्रेरणादायी व्याख्यान

चोपडा प्रतिनिधी : वडती येथील पूज्य साने गुरुजी माध्यमिक विद्यालयात साने गुरुजी जयंती मोठ्या उत्साहात साजरी करण्यात आली. शाळेच्या रोप्य महोत्सवी वर्षाच्या सांगता समारंभाचे औचित्य साधत बुधवार, दि. २४ डिसेंबर २०२५ रोजी हा कार्यक्रम पार पडला. कार्यक्रमाची सुरुवात शाळेच्या विद्यार्थिनींनी सादर केलेल्या इशस्तवन व स्वागतगीताने झाली. यानंतर मान्यवरांनी साने गुरुजींच्या प्रतिमेचे पूजन करून माल्यार्पण केले.

कार्यक्रमात प्रमुख व्याख्याते म्हणून सुप्रसिद्ध शिवव्याख्यानकार प्रा. सचिन देवरे यांनी “चला साने गुरुजी होऊ” या विषयावर प्रभावी व प्रेरणादायी व्याख्यान दिले. मातृहृदयी साने गुरुजींच्या जीवनातील विविध उदाहरणांद्वारे त्यांनी विद्यार्थ्यांसह उपस्थित श्रोत्यांना मंत्रमुग्ध केले. कार्यक्रमाचे अध्यक्षस्थान संस्थेचे ज्येष्ठ संचालक आबासाहेब (श्री. डी. बी. पाटील) यांनी भूषविले.

प्रमुख पाहुणे म्हणून संस्थेचे अध्यक्ष अण्णासाहेब चंद्रकांत गुलाबराव पाटील, उपाध्यक्ष मनोजभाऊ चित्रकथी, शाळेच्या संचालिका पुष्पा हरी जोशी, चोपडा नगरपालिकेचे प्रकल्प अधिकारी गणेशभाऊ पाठक, वडती गावाचे सरपंच देविदास धनगर, विवेकानंद विद्यालयाचे मुख्याध्यापक नरेंद्र भावे, चोपडा तालुका मुख्याध्यापक संघाचे अध्यक्ष प्रवीण पाटील, बालमोहन विद्यालयाच्या मुख्याध्यापिका रेखा पाटील, सनपूले माध्यमिक विद्यालयाचे मुख्याध्यापक मंगेश चौधरी तसेच माजी मुख्याध्यापक एल. एच. पाटील आदी मान्यवर उपस्थित होते.

कार्यक्रमाचे प्रास्ताविक व पाहुण्यांचा परिचय शाळेचे मुख्याध्यापक संजय हरी जोशी यांनी केला. सूत्रसंचालन अतुल धनगर यांनी केले, तर आभारप्रदर्शन जगदीश पाठक यांनी मानले. कार्यक्रमासाठी संस्थेच्या सर्व विभागांतील कर्मचारी, विष्णापूर ग्रामपंचायतीचे सरपंच व सदस्य, ग्रामस्थ तसेच माजी विद्यार्थी मोठ्या संख्येने उपस्थित होते. कार्यक्रमाच्या यशस्वीतेसाठी शिक्षक अतुल चव्हाण, चेतन पाटील, राजेश चौधरी, प्रशांत गुरव, रवींद्र पाटील, विजय पालीवाल, विनोद धनगर तसेच शिक्षकेतर कर्मचारी विजय दीक्षित, लीलाधर महाजन, कैलास सुतार यांनी परिश्रम घेतले.