वधू-वर परिचय मेळावा हा सामाजिक चळवळीचा भाग

वधू-वर परिचय मेळावा हा सामाजिक चळवळीचा भाग

वीर गुर्जर सेना बैठकीत मान्यवरांचा सूर ; लवकरच परिचय मेळाव्याचे आयोजन

जळगाव : समाजातील युवक-युवतींना योग्य जोडीदार मिळावा तसेच समाजात ऐक्य आणि संवाद वाढावा या उद्देशाने वधू-वर परिचय मेळावा हा सामाजिक चळवळीचा एक महत्त्वाचा भाग असल्याचे मत वीर गुर्जर सेनेच्या बैठकीत मान्यवरांनी व्यक्त केले. वीर गुर्जर सेनातर्फे आयोजित करण्यात येणाऱ्या वधू-वर परिचय मेळाव्याच्या तयारीसंदर्भात नुकतीच बैठक पार पडली.

४ मार्च २०२६ रोजी पद्मालय रेस्ट हाऊस येथे दुपारी १ वाजता वधू-वर परिचय मेळाव्याचे आयोजन करण्याचा निर्णय बैठकीत घेण्यात आला. समाजातील अविवाहित युवक-युवतींसाठी एक व्यासपीठ उपलब्ध करून देणे, कुटुंबांमध्ये परस्पर संवाद वाढवणे आणि विवाह जुळविण्याची प्रक्रिया सुलभ करणे हा या मेळाव्याचा मुख्य उद्देश असल्याचे बैठकीत सांगण्यात आले.

बैठकीला राज्याचे पाणीपुरवठा मंत्री नामदार गुलाबराव पाटील यांचे स्वीय सहायक नवलसिंग राजे पाटील तसेच वीर गुर्जर सेनेचे राष्ट्रीय अध्यक्ष हेमंत पाटील ,मबगल पाटील यांच्यासह पदाधिकारी कार्यकर्ते उपस्थित होते. त्यांनी या उपक्रमाचे कौतुक करत समाजातील सर्व घटकांनी या मेळाव्यात सक्रिय सहभाग नोंदवावा, असे आवाहन केले.

बैठकीत समाजातील विविध भागांतील प्रतिनिधींनी उपस्थित राहून मेळाव्याच्या आयोजनाबाबत सूचना मांडल्या. ग्रामीण भागातील युवक-युवतींना देखील या उपक्रमाचा लाभ मिळावा यासाठी व्यापक जनजागृती करण्याचा निर्णय घेण्यात आला. तसेच कार्यक्रम यशस्वी करण्यासाठी समाजातील पदाधिकारी, कार्यकर्ते आणि समाजबांधवांनी एकत्रितपणे काम करण्याचे ठरविण्यात आले.या वधू-वर परिचय मेळाव्याच्या माध्यमातून समाजातील तरुण पिढीला योग्य दिशा मिळेल आणि समाजातील एकोपा अधिक दृढ होईल, असा विश्वासही बैठकीत व्यक्त करण्यात आला.