विद्यापीठाचा २९३ कोटी ५७ लाखांचा अर्थसंकल्प मंजूर

विद्यापीठाचा २९३ कोटी ५७ लाखांचा अर्थसंकल्प मंजूर

तूट १५ कोटी ४४ लाख, विकासात्मक योजनांवर भर
जळगाव (प्रतिनिधी) – कवयित्री बहिणाबाई चौधरी उत्तर महाराष्ट्र विद्यापीठाच्या सन २०२६-२७ च्या २९३ कोटी ५७ लाख रुपयांच्या अर्थसंकल्पाला अधिसभेच्या बैठकीत मान्यता देण्यात आली. या अर्थसंकल्पात १५.४४ कोटी रुपयांची तूट दर्शविली आहे.
कुलगुरू प्रा. व्ही.एल. माहेश्वरी यांच्या अध्यक्षतेखाली झालेल्या अधिसभेत व्यवस्थापन परिषद सदस्य नितीन झाल्टे यांनी अर्थसंकल्प सादर केला. गतवर्षी ३१७.९६ कोटींचा अर्थसंकल्प होता, त्यामध्ये तूट १७.८७ कोटी रुपये होती. यंदा तूट १.६९ कोटी रुपयांनी कमी झाली आहे.

अर्थसंकल्पात परिरक्षणासाठी २१३.९२ कोटी, योजनांतर्गत विकासासाठी ४५.०५ कोटी, विशेष कार्यक्रमांसाठी ३४.६० कोटी नियोजित आहेत. महसूली खर्च १८५.९३ कोटी, भांडवली खर्च २७.९९ कोटी, विकासात्मक खर्च ४५.५ कोटी व इतर कार्यक्रमांसाठी ३४.६० कोटी आहेत.

विद्यार्थी विकास विभागासाठी आपत्ती व्यवस्थापन कक्ष, प्रशिक्षण कार्यशाळा, चाणक्य स्पर्धा परीक्षा केंद्र, ग्राम दत्तक योजना यासाठी १७१ लाखांची भरघोस वाढ करण्यात आली आहे. क्रीडा विभागासाठी १७ लाखांची वाढ, संशोधन व विकास विभागासाठी ४० लाखांची वाढ करण्यात आली आहे. महोत्सव अविष्काराची आर्थिक मर्यादा १५ लाखांवरून २० लाख व युवक महोत्सवासाठी ७ लाखांवरून २० लाख करण्यात आली आहे.

अधिसभेत दीपक पाटील, आ. डॉ. मनीषा कायंदे, अमोल मराठे, नितीन ठाकूर आदी सदस्यांनी कपात सूचना दिल्या, ज्यावर वित्त अधिकारी सीए रवींद्र पाटील यांनी माहिती दिली आणि चर्चा करून कपात सूचना मागे घेतल्या. अर्थसंकल्पाला अखेर मान्यता मिळाली.

प्रश्नोत्तरात विष्णू भंगाळे, प्रा. जयवंत मगर, डॉ. ऋषीकेश चित्तम यांनी प्रश्न विचारले, तर प्रा. योगेश पाटील, प्र-कुलगुरू प्रा.एस.टी. इंगळे व कुलसचिव डॉ. विनोद पाटील यांनी उत्तरे दिली. सभेच्या सुरुवातीस दिवंगत उपमुख्यमंत्री अजित पवार व माजी कुलसचिव डॉ. एम. व्ही. बरीदे यांना श्रध्दांजली अर्पण करण्यात आली. नवीन सदस्य आमदार डॉ. मनीषा कायंदे व डॉ. चंद्रशेखर वाणी यांचे स्वागतही करण्यात आले.
उपस्थित अधिकारी व कर्मचारी
कुलसचिव डॉ. विनोद पाटील यांनी सूत्रसंचालन केले. प्राचार्य एस.एस. राजपूत, प्रा. जगदीश पाटील, प्रा. अनिल डोंगरे, डॉ. राजेश जवळेकर, डॉ. दिनेश पाटील, प्रा. आशुतोष पाटील, प्राचार्य संजय सुराणा, प्राचार्य सखाराम पाटील, प्राचार्य आय.डी. पाटील, प्राचार्य महेंद्र रघुवंशी, डॉ. पवित्रा पाटील, प्रा. वैशाली पाटील, भरत गावीत, विलास जोशी, प्रा. संदीप नेरकर, प्रा.एस.टी. भुकन, केदारनाथ कवडीवाले, प्रा. गजानन पाटील, डॉ. मंदा गावीत, प्रा. सुरेखा पालवे, प्रा. वर्षा पाटील, डॉ. पद्माकर पाटील, प्रा. विशाल पराते, प्रा. किर्ती कमळजा, दिनेश खरात, स्वप्नाली महाजन, भानुदास येवलेकर, जयंत उत्तरवार, नरेंद्र नारखेडे, अॅड. केतन डाके, नेहा जोशी, वैशाली वराडे यासह अनेक अधिकारी उपस्थित होते.