विद्यापीठाच्या जैवशास्त्र प्रशाळेतील अद्ययावत सभागृहाचे उदघाटन

विद्यापीठाच्या जैवशास्त्र प्रशाळेतील अद्ययावत सभागृहाचे उदघाटन

जळगाव (प्रतिनिधी) : कवयित्री बहिणाबाई चौधरी उत्तर महाराष्ट्र विद्यापीठाच्या जैवशास्त्र प्रशाळेतील अद्ययावत सभागृहाचे उदघाटन व रिसर्च, पेटंट पब्लीकेशन ॲवार्ड व स्वयंम कोर्सेसमधील सर्वोत्कृष्ट ठरलेल्या विद्यार्थ्यांना पुणे येथील राष्ट्रीय रासायनिक प्रयोगशाळेचे मुख्य शास्त्रज्ञ प्रा. अशोक गिरी व कुलगुरू प्रा. व्ही.एल. माहेश्वरी यांच्या हस्ते देण्यात आले.

यावेळी मंचावर पुणे येथील रासायनिक प्रयोगशाळेचे शास्त्रज्ञ प्रा. रामरूप सरकार, सेवा निवृत्त मुख्य शास्त्रज्ञ प्रा.एम.व्ही. बडीगर, व्यवस्थापन परिषद सदस्य प्रा.जे.व्ही. साळी व जैवशास्त्र प्रशाळेचे संचालक प्रा. भुषण चौधरी हे उपस्थित होते.‍ कार्यक्रमाच्या सुरुवातीस जैवशास्त्र प्रशाळेतील अद्ययावत सभागृहाचे उद्घाटन प्रा. अशोक गिरी यांच्या हस्ते करण्यात आले. उद्घाटकीय भाषण करतांना प्रा. अशोक गिरी यांनी संशोधक विद्यार्थ्यांना सांगितले की, इंग्रजी भाषेचा न्यूनगंड ठेवू नका तुम्ही जरी मराठी माध्यमातून शिकला असाल तरी तुमची संकल्पना संशोधनात महत्वाची ठरते. कुलगुरू प्रा. व्ही.एल. माहेश्वरी यांनी अध्यक्षीय भाषणात विद्यापीठाने संशोधनासाठी सुरु केलेल्या योजनांचा लाभ घ्यावा असे सांगून ध्येय निश्चित करून स्वत: रोल मॉडेल व्हा अशा पध्दतीने जीवनात यशस्वी व्हा असे सांगितले. प्रास्ताविक प्रा. भूषण चौधरी यांनी तर स्वयंम कोर्सेसची माहिती जयदीप साळी यांनी दिली.

यावेळी कुलगुरु संशोधन प्रोत्साहन योजने अंतर्गत रिसर्च पब्लीकेशन ॲवार्ड – २०२५ मिळालेल्या विद्यापीठीय रसायन तंत्रज्ञान संस्थेतील एकनाथ कोले, धनंजय पगारे, जगदीश वानखेडे, रसायन शास्त्र प्रशाळेतील प्रतिक वाघ, गणितशास्त्र प्रशाळेतील ललिता नेरकर, पर्यावरण व भूशास्त्र प्रशाळेतील प्रज्ञा केदार व योगिता पाटील यांना प्रमाणपत्र व रोख पारितोषिक देण्यात आले.

पेटंट पब्लीकेशन ॲवार्ड – २०२५ जगदीश वानखेडे या संशोधक विद्यार्थ्यास देण्यात आला. या कार्यक्रमात स्वयंम कोर्सेसमध्ये राष्ट्रीय पातळीवर सर्वोच्च १% यशस्वी ठरलेल्या विद्यार्थ्यांमधील जैवशास्त्र प्रशाळेतील इशा पटेल व सर्वोच्च ५% यशस्वी ठरलेल्या विद्यार्थ्यांमधील भौतिकशास्त्र प्रशाळेतील रोहन बोरसे यांना प्रमाणपत्र देवून गौरवांकित करण्यात आले. या कार्यक्रमाचे औचित्य साधून राष्ट्रीय विज्ञान दिवस व इतर स्पर्धांमधून जैवशास्त्र प्रशाळा व भौतिकशास्त्र प्रशाळेतील यशस्वी विद्यार्थ्यांना पारितोषिके मंचावर वरील मान्यवरांच्या हस्ते देण्यात आलीत. या कार्यक्रमाचे सूत्रसंचालन व आभार सहायक कुलसचिव प्रवीण चंदनकर यांनी केले तर जैवशास्त्र प्रशाळेच्या पुरस्कारांची घोषणा प्रा. प्रवीण पुराणिक व भौतिकशास्त्र प्रशाळेच्या पुरस्कारांची घोषणा प्रा. गौरी घोष यांनी केले.