वीजबिल वसुलीसह ग्राहकांना सर्वोत्तम सेवा द्या

वीजबिल वसुलीसह ग्राहकांना सर्वोत्तम सेवा द्या

महावितरणचे कार्यकारी संचालक प्रसाद रेशमे यांचे निर्देश; थकबाकी शून्यावर आणण्यासाठी मोहीम राबविण्याचे आदेश

जळगाव : सर्व ग्राहकांना सुरळीत आणि दर्जेदार वीजपुरवठा देण्यास प्राधान्य द्यावे. तसेच वीजहानी कमी करून वीजबिलांच्या वसुलीला अधिक वेग द्यावा, असे निर्देश प्रसाद रेशमे यांनी शुक्रवारी दिले.
महावितरणच्या जळगाव परिमंडल कार्यालयात झालेल्या आढावा बैठकीत ते बोलत होते. यावेळी मुख्य अभियंता आय. ए. मुलाणी उपस्थित होते. रेशमे यांनी सांगितले की, परिमंडलातील जळगाव, धुळे आणि नंदुरबार या तिन्ही जिल्ह्यांत गेल्या काही महिन्यांपासून वीजबिलांच्या थकबाकीत सातत्याने वाढ होत आहे. महावितरणच्या आर्थिक स्थैर्यासाठी वीजबिल वसुली अत्यावश्यक असून कोणत्याही सबबी न सांगता थकबाकी शून्यावर आणण्यासाठी प्रयत्न करण्याचे त्यांनी सांगितले. यात हलगर्जीपणा करणाऱ्यांवर कारवाई करण्यात येईल, असा इशाराही त्यांनी दिला.
जिल्ह्यात थकबाकीमुळे वीजपुरवठा कायमस्वरूपी खंडित करण्यात आलेल्या ग्राहकांची संख्या मोठी असल्याचे त्यांनी निदर्शनास आणून दिले. त्यामुळे वीजहानी वाढत असून विशेष मोहीम राबवून वीजचोरी आढळल्यास तात्काळ कारवाई करण्याचे निर्देश देण्यात आले. तसेच छतावरील सौरऊर्जा (रूफटॉप सोलर) ग्राहकांचे मीटर रीडिंग स्मार्ट मीटरच्या माध्यमातूनच येणे आवश्यक असल्याचे त्यांनी स्पष्ट केले. औद्योगिक व व्यावसायिक ग्राहकांकडील वीजबिलांची थकबाकी कोणत्याही परिस्थितीत शंभर टक्के वसूल करण्यावर भर देण्यात आला.
थकबाकीदार ग्राहकांनी प्रतिसाद न दिल्यास त्यांचा वीजपुरवठा खंडित करून अनधिकृत वीजवापर होत नाही याची पडताळणी करण्याचेही निर्देश त्यांनी दिले. दरमहा १०० युनिटपर्यंत वीज वापर असलेल्या दारिद्र्यरेषेखालील व आर्थिकदृष्ट्या दुर्बल घरगुती ग्राहकांसाठी राज्य सरकारने सुरू केलेल्या स्वयंपूर्ण महाराष्ट्र आवासीय छतावरील सौरऊर्जा (स्मार्ट) योजनेचा लाभ घेण्यासाठी नागरिकांना प्रोत्साहित करण्याचे आवाहनही त्यांनी केले. महावितरणने मागविलेल्या निविदेनुसार एक किलोवॅट क्षमतेच्या छतावरील सौरऊर्जा प्रकल्पाची किंमत सुमारे ४५ हजार रुपये निश्चित करण्यात आली असून शासनाच्या अनुदानामुळे ग्राहकांना मोठी बचत होणार असल्याचे त्यांनी सांगितले.
बैठकीत विविध योजनांचा आढावा घेऊन कामांना गती देण्याचे निर्देश देण्यात आले. या वेळी जळगाव परिमंडलातील अधीक्षक अभियंते, कार्यकारी अभियंते, उपविभागीय अभियंते तसेच वित्त, लेखा व माहिती तंत्रज्ञान विभागाचे अधिकारी उपस्थित होते.