वॉकिंग दरम्यान हृदयविकाराने एमएसएफ जवानाचा मृत्यू

वॉकिंग दरम्यान हृदयविकाराने एमएसएफ जवानाचा मृत्यू

भुसावळ : दीपनगर औष्णिक वीज निर्मिती केंद्रातील ५०० मेगावॉट प्रकल्पात कार्यरत असलेल्या एमएसएफ (महाराष्ट्र सुरक्षा बल) मधील जवान गणेश बापू दैवत (वय ३१, रा.माहिजी, ता.पाचोरा) यांचे मंगळवारी सायंकाळी हृदयविकाराच्या झटक्याने निधन झाले. ही घटना क्रिकेट मैदानावर वॉकिंग करत असताना घडली. गणेश दैवत हे ११ जून रोजी आपली जनरल ड्युटी पूर्ण करून नेहमीप्रमाणे सायंकाळी वॉकसाठी गेले होते. दरम्यान अचानक त्यांना अस्वस्थ वाटू लागले आणि काही क्षणांतच ते मैदानावर कोसळले. त्या वेळी परिसरात पाऊस सुरू झाला होता. काही वेळानंतर देखरेख करणारे जवान खैरनार यांनी त्यांना हालचाल न करताना पाहून त्वरित वरिष्ठ अधिकारी प्रवीण खैरे यांना माहिती दिली. प्रवीण खैरे तत्काळ घटनास्थळी दाखल झाले व प्राथमिक उपचार करण्याचा प्रयत्न केला. मात्र, गणेश दैवत यांनी कोणताही प्रतिसाद दिला नाही. त्यानंतर त्यांना भुसावळ येथील एका खासगी रुग्णालयात दाखल करण्यात आले. परंतु डॉक्टरांनी त्यांना मृत घोषित केले.