वॉटर हिटरचा शॉक बसून फर्निचर कारागीराचा मृत्यू

वॉटर हिटरचा शॉक बसून फर्निचर कारागीराचा मृत्यू

अचानक घडलेल्या दुर्घटनेने हनुमान नगर परिसरात शोककळा

पाचोरा (प्रतिनिधी) — पाचोरा शहरातील हनुमान नगर परिसरात बुधवारी सकाळी ४४ वर्षीय फर्निचर कारागीर धनराज सुखदेव मिस्तरी यांचा अचानक मृत्यू झाला. अंघोळीसाठी घरातील बाथरूममध्ये गेलेल्या धनराज मिस्तरी यांना वॉटर हिटरचा जोरदार विद्युत शॉक बसल्यामुळे ते जागीच ठार झाले.
धनराज मिस्तरी (वय ४४, रा. ए-वन काट्याजवळ, हनुमान नगर, पाचोरा) यांच्या पश्चात वृद्ध आई, पत्नी, एक मुलगा, एक मुलगी आणि दोन बहिणी असा कुटुंब आहे. सकाळी सुमारे ८ वाजण्याच्या सुमारास अंघोळीसाठी बाथरूममध्ये गेलेल्या धनराज मिस्तरी यांना हिटरच्या स्पर्शामुळे जोराचा शॉक बसल्याचे प्राथमिक तपासात समोर आले आहे.
बेशुद्धावस्थेत कुटुंबीयांनी तातडीने त्यांना पाचोरा ग्रामीण रुग्णालयात दाखल केले असता वैद्यकीय अधिकार्‍यांनी तपासणी करून त्यांना मृत घोषित केले. या अचानक घडलेल्या दुर्घटनेने कुटुंबीयांवर दु:खाचा डोंगर कोसळला आहे.
घटनेप्रकरणी पाचोरा पोलिसात अकस्मात मृत्यूची नोंद करण्यात आली असून तपास पोलीस निरीक्षक राहुलकुमार पवार यांच्या मार्गदर्शनाखाली पोलीस कॉन्स्टेबल संदीप राजपूत करत आहेत. प्राथमिक तपासानुसार वॉटर हिटरच्या विद्युत प्रवाहामुळे ही दुर्दैवी घटना घडल्याची शक्यता वर्तविण्यात येत आहे.
धनराज मिस्तरी हे फर्निचर काम करून कुटुंबाचा उदरनिर्वाह करत होते. त्यांचा स्वभाव अत्यंत शांत आणि मनमिळाऊ असल्याने, त्यांच्या अचानक निधनामुळे हनुमान नगरसह परिसरात शोककळा पसरली आहे.