व्यापाऱ्याच्या डोळ्यात मिरची पूड फेकून साडेपाच लाख लुटणारा जेरबंद; एलसीबीची नाशिकमध्ये कारवाई

व्यापाऱ्याच्या डोळ्यात मिरची पूड फेकून साडेपाच लाख लुटणारा जेरबंद; एलसीबीची नाशिकमध्ये कारवाई

​धुळ्याचा आरोपी गजाआड; सीसीटीव्ही फुटेजच्या आधारे पोलिसांनी लावला छडा

​अमळनेर | प्रतिनिधी

स्कुटीवर जाणाऱ्या व्यापाऱ्याच्या डोळ्यात मिरचीची पूड फेकून साडेपाच लाख रुपयांची बॅग लांबवणाऱ्या टोळीपैकी एका सदस्याला अटक करण्यात स्थानिक गुन्हे शाखेच्या (LCB) पथकाला यश आले आहे. मनोज अधिक मोकल (वय २५, रा. मोहाडी, जि. धुळे) असे अटक करण्यात आलेल्या आरोपीचे नाव असून, त्याला नाशिक येथून ताब्यात घेण्यात आले आहे.

​ही घटना २५ फेब्रुवारी रोजी सकाळी अमळनेर येथील पिंपळे रस्त्यावर घडली होती. बाजार समितीचे व्यापारी यतीन कोठारी हे आपल्या स्कुटीवरून लामा जीनकडे जात असताना एका मोटारसायकलवरून तोंडाला मास्क लावलेले तीन चोरटे त्यांच्याजवळ आले. चोरट्यांनी आधी कोठारी यांचा चष्मा काढून फेकला आणि नंतर त्यांच्या डोळ्यात मिरचीची पूड फेकली. डोळ्यांची आग होत असूनही कोठारी यांनी पुढे जाण्याचा प्रयत्न केला, मात्र चोरट्यांनी पुन्हा मिरची पूड फेकून त्यांना थांबवण्यास भाग पाडले. याच झटापटीत त्यांच्याजवळील साडेपाच लाख रुपयांची रोख रक्कम असलेली पिशवी खाली पडली. चोरट्यांनी ती पिशवी उचलली आणि मंगरूळ मार्गे धुळ्याच्या दिशेने फरार झाले.

​सीसीटीव्ही फुटेज ठरले निर्णायक

​घटनेची माहिती मिळताच अमळनेर पोलीस ठाण्याचे निरीक्षक दत्तात्रय निकम यांनी तात्काळ तपासाची चक्रे फिरवली. पोलीस उपनिरीक्षक शरद काकळीज, मिलिंद सोनार, विनोद संदानशिव आणि निलेश मोरे यांच्या पथकाने परिसरातील सीसीटीव्ही फुटेजची तपासणी केली. यामध्ये तिन्ही आरोपी कैद झाले होते. फुटेजमधील वर्णनावरून अवघ्या एका तासात आरोपी धुळे जिल्ह्यातील असल्याचे निष्पन्न झाले. पोलीस पथक तात्काळ धुळ्यात आरोपींच्या घरापर्यंत पोहोचले, मात्र तोपर्यंत चोरटे पैशांचे वाटप करून पसार झाले होते.

​नाशिकमधून आरोपीच्या आवळल्या मुसक्या

​या प्रकरणाचा तांत्रिक तपास स्थानिक गुन्हे शाखेचे पोलीस उपनिरीक्षक जितेंद्र वलटे, पोलीस कॉन्स्टेबल संदीप पाटील आणि प्रवीण मांडोळे यांनी सुरू ठेवला होता. आरोपींचा माग काढत असताना मनोज मोकल हा नाशिक येथे लपून बसल्याची माहिती पोलिसांना मिळाली. त्यानुसार पथकाने नाशिकमध्ये सापळा रचून मनोजला बेड्या ठोकल्या. या गुन्ह्यातील इतर दोन साथीदारांचा पोलीस आता कसून शोध घेत आहेत.