व्हाईट-पिवळ्या पट्ट्यांनी’ जळगावचे रूप पालटणार!

व्हाईट-पिवळ्या पट्ट्यांनी’ जळगावचे रूप पालटणार!

महापौर दीपमाला काळे यांच्या पुढाकाराने सुशोभीकरण मोहिमेला वेग

जळगाव (प्रतिनिधी):- शहराच्या सौंदर्यीकरणासह वाहतूक शिस्तीला चालना देण्यासाठी महापौर दीपमाला काळे यांच्या पुढाकारातून सुरू करण्यात आलेल्या विशेष मोहिमेला आता वेग आला असून, मुख्य रस्त्यांवर ‘व्हाईट’ आणि ‘पिवळ्या’ पट्ट्यांच्या कामाला प्रत्यक्ष सुरुवात झाली आहे. रविवारी (दि. १२) रात्री ९ वाजेपासून या कामाचा शुभारंभ करण्यात आला.

शहरातील महत्त्वाच्या मार्गांवर झेब्रा क्रॉसिंग आणि लेन मार्किंग करण्याच्या या उपक्रमामुळे वाहतुकीचे नियोजन अधिक शिस्तबद्ध होणार आहे. पहिल्या टप्प्यात शिवतीर्थ चौक ते आकाशवाणी चौक या मुख्य मार्गावर पट्टे टाकण्याचे काम युद्धपातळीवर हाती घेण्यात आले असून, रात्रीच्या कमी वाहतुकीच्या वेळेत हे काम केल्याने गती मिळाली आहे. सोमवारी सकाळपर्यंत या मार्गाचे रूप पालटल्याचे चित्र पाहायला मिळाले.

या कामाची पाहणी महापौर दीपमाला काळे, उपमहापौर मनोज चौधरी तसेच स्थायी समिती सभापती डॉ. चंद्रशेखर पाटील यांनी प्रत्यक्ष भेट देऊन केली. यावेळी त्यांनी संबंधित कंत्राटदारांना आवश्यक सूचना देत काम दर्जेदार आणि वेळेत पूर्ण करण्याचे निर्देश दिले.

शहरातील वाढती वाहतूक आणि अपघातांची संख्या लक्षात घेता रस्ते मार्किंगची आवश्यकता प्रकर्षाने जाणवत होती. गेल्या काही काळापासून महापौरांनी सार्वजनिक बांधकाम विभागाकडे सातत्याने पाठपुरावा केल्यामुळे हे काम प्रत्यक्षात आले आहे. या उपक्रमामुळे वाहनचालकांना लेनची स्पष्ट जाणीव होऊन अपघातांवर नियंत्रण मिळण्यास मदत होणार आहे.

दरम्यान, शहराच्या सुशोभीकरणासाठी आणि नागरिकांच्या सोयीसाठी घेतलेल्या या निर्णयाचे जळगावकरांकडून स्वागत होत असून, महापौरांच्या कामकाजाचे सर्वत्र कौतुक केले जात आहे.