व्हिडिओ कॉलद्वारे विद्यार्थ्याला ब्लॅकमेल; सुमारे सहा लाखांची ऑनलाईन फसवणूक

व्हिडिओ कॉलद्वारे विद्यार्थ्याला ब्लॅकमेल; सुमारे सहा लाखांची ऑनलाईन फसवणूक

विवस्त्र व्हिडिओ व्हायरल करण्याची धमकी; सायबर पोलिस ठाण्यात गुन्हा दाखल

जळगाव : व्हिडिओ कॉलद्वारे एका १९ वर्षीय विद्यार्थ्याचा विवस्त्र व्हिडिओ तयार करून त्याला ब्लॅकमेल करत तब्बल ५ लाख ९५ हजार ४५० रुपयांची ऑनलाईन फसवणूक केल्याचा धक्कादायक प्रकार समोर आला आहे. ही घटना ५ सप्टेंबर ते २१ डिसेंबर २०२५ या कालावधीत घडली असून या प्रकरणी सायबर पोलिस ठाण्यात ५ मार्च रोजी गुन्हा दाखल करण्यात आला आहे.

मिळालेल्या माहितीनुसार, चाळीसगाव येथील १९ वर्षीय तरुण नाशिक येथे बीसीएसच्या प्रथम वर्षाचे शिक्षण घेत आहे. ५ सप्टेंबर रोजी तो फेसबुकवर पाहत असताना ‘ऑनलाईन मुलींशी बोलण्यासाठी खालील लिंकवर क्लिक करा’ असा संदेश त्याला दिसला. उत्सुकतेपोटी त्याने त्या लिंकवर क्लिक केल्यानंतर एक अॅप उघडले आणि त्यामध्ये मुलींच्या नावाने विविध खाती दिसू लागली.

काही वेळाने एका अनोळखी क्रमांकावरून त्या विद्यार्थ्याला ‘हाय’ असा मेसेज आला. त्यावर विद्यार्थ्याने सुरुवातीला प्रतिसाद दिला नाही. मात्र काही वेळाने त्याच क्रमांकावरून व्हिडिओ कॉल आला. कॉल उचलल्यानंतर समोर एक महिला विवस्त्र अवस्थेत दिसत होती आणि ती अश्लील हातवारे करत होती. काही वेळाने त्या महिलेच्या बोलण्याला प्रतिसाद देताना विद्यार्थ्यानेही अंगावरील कपडे काढले. सुमारे दहा मिनिटे हा व्हिडिओ कॉल सुरू राहिला. दरम्यान महिला वारंवार तेच बोलत असल्याचे लक्षात येताच विद्यार्थ्याने कॉल कट केला.

कॉल कट केल्यानंतर संबंधित महिलेने विद्यार्थ्याचा विवस्त्र व्हिडिओ त्यालाच पाठवून तो सोशल मीडियावर व्हायरल करण्याची धमकी दिली. हा व्हिडिओ डिलीट करायचा असल्यास ‘डिलीट कार्ड’ घ्यावे लागेल आणि त्यासाठी पैसे द्यावे लागतील, असा संदेश पाठवण्यात आला. यानंतर विद्यार्थी घाबरल्याने समोरील व्यक्तीने पाठवलेल्या पेमेंट लिंकवरून वेळोवेळी एकूण ५ लाख ९५ हजार ४५० रुपये पाठविले.

याचदरम्यान विद्यार्थ्याला आणखी एक फोन आला. फोन करणाऱ्या व्यक्तीने स्वतःला दिल्ली सायबर पोलिसातील एसपी ‘राम पांडे’ असल्याचे सांगत विद्यार्थ्याने एका महिलेसोबत विवस्त्र व्हिडिओ कॉल केल्याची तक्रार आल्याचे सांगितले. प्रकरण मिटवायचे असल्यास पैसे द्यावे लागतील, अशी धमकीही देण्यात आली. या भीतीमुळे विद्यार्थ्याने पुन्हा पुन्हा पैसे पाठविले.

दरम्यान, फसवणूक झालेल्या विद्यार्थ्याच्या वडिलांचे चाळीसगाव येथे छोटेसे दुकान असून त्यांच्या बँक खात्यातील रक्कम विद्यार्थ्याने संबंधित व्यक्तींना पाठविली. काही दिवसांनी हा प्रकार विद्यार्थ्याने घरी सांगितल्यानंतर कुटुंबीयांनी सायबर पोलिसांकडे धाव घेतली.
या प्रकरणी सायबर पोलिस ठाण्यात अज्ञात महिला तसेच तोतया पोलिस अधिकाऱ्यांविरुद्ध गुन्हा दाखल करण्यात आला असून पुढील तपास पोलिस निरीक्षक सतीश गोराड करीत आहेत.