शालेय क्रीडा स्पर्धांचे नियोजनासाठी तालुका समन्वयकांची बैठक संपन्न

शालेय क्रीडा स्पर्धांचे नियोजनासाठी तालुका समन्वयकांची बैठक संपन्न

सर्व अर्ज प्रक्रिया ऑनलाईन, प्रशिक्षकांकरिता कार्यशाळा आयोजित होणार

जळगाव  (प्रतिनिधी) – क्रीडा व युवक सेवा संचालनालय, महाराष्ट्र राज्य अंतर्गत जिल्हा क्रीडा अधिकारी कार्यालयाच्या वतीने शालेय तसेच विविध क्रीडा स्पर्धांचे आयोजन सन २०२५–२६ मध्ये करण्यात येणार आहे. या अनुषंगाने जिल्ह्यातील सर्व तालुका क्रीडा समन्वयकांची नियोजन बैठक दि. ८ जुलै २०२५ रोजी सकाळी १२ वाजता श्री छत्रपती शिवाजी महाराज जिल्हा क्रीडा संकुल, जळगाव येथे आयोजित करण्यात आली होती.

या बैठकीत मागील वर्षीच्या स्पर्धांतील अडचणी, सुधारणा तसेच यंदाच्या स्पर्धांचे सुयोग्य नियोजन यावर सविस्तर चर्चा करण्यात आली. २५ जुलै २०२५ पर्यंत सर्व तालुकास्तरीय बैठका घेण्यात याव्यात, असे निर्देश यावेळी देण्यात आले. यंदा सर्व क्रीडा स्पर्धांचे अर्ज, शुल्क, प्रमाणपत्र आदी संपूर्ण प्रक्रिया ऑनलाईन प्रणालीद्वारे करण्यात येणार असून, ही सुविधा जिल्हा क्रीडा अधिकारी कार्यालयाच्या संकेतस्थळावर उपलब्ध राहणार आहे.

मैदानी क्रीडा स्पर्धांसाठी हर्डल्सची सुविधा सर्व तालुक्यांमध्ये पुरवण्यात येणार असून, निवडक शाळांमध्ये योगासन, सॉफ्टबॉल व खो-खो खेळांचे प्रशिक्षणही देण्यात येणार आहे. योगासनासाठी कु. चंचल माळी, सॉफ्टबॉलसाठी आंतरराष्ट्रीय प्रशिक्षक श्री. किशोर चौधरी तर खो-खोसाठी श्री. मिनल थोरात हे मार्गदर्शक म्हणून प्रशिक्षण देतील. सर्व क्रीडा शिक्षकांसाठी एक दिवसीय कार्यशाळा आयोजित करण्यात येणार असून, त्यांना मोफत व खुला प्रवेश राहील.

शालेय शिक्षण व क्रीडा विभागाच्या शासन निर्णयानुसार सर्व शाळा, विद्यालये व शैक्षणिक संस्थांनी या स्पर्धांमध्ये सहभाग नोंदवणे आवश्यक आहे. यासाठी जिल्हा क्रीडा अधिकारी श्री. रविंद्र नाईक यांनी उपस्थित शिक्षक व समन्वयकांना जास्तीत जास्त विद्यार्थ्यांचा सहभाग वाढविण्याचे आवाहन केले.

या बैठकीत ‘Train the Trainers’ ही संकल्पना मांडून त्याच्या प्रभावी अंमलबजावणीसाठी मार्गदर्शन करण्यात आले. तसेच चोपडा, यावल व रावेर या तालुक्यांमध्ये सातपुडा पर्वतरांगांमध्ये १०० किमी सायकल स्पर्धा/मॅरेथॉन घेण्याची नाविन्यपूर्ण कल्पनाही यावेळी सादर करण्यात आली.

या बैठकीस तालुका क्रीडा समन्वयक श्री. अजय जाधव (चाळीसगाव), श्री. आसिफ खान (जामनेर), श्री. सुनील वाघ (अमळनेर), श्री. युवराज माळी (रावेर), श्री. संदीप पवार (पारोळा), श्री. सचिन सूर्यवंशी (धरणगाव), श्री. राजेंद्र आल्हाट (चोपडा), श्री. संजीव वाढे (मुक्ताईनगर), श्री. गिरीश पाटील (पाचोरा), डॉ. सचिन भोसले (भडगाव), श्री. मनोज पाटील (एरंडोल), श्री. प्रशांत कोल्हे (जळगाव), श्री. दिलीप सांगेले (यावल), श्री. प्रदीप साखरे (भुसावळ), श्री. संजय निकम (बोदवड) यांच्यासह जिल्हा क्रीडा कार्यालयातील अधिकारी व कर्मचारी श्री. जगदीश चौधरी, श्री. सचिन निकम, श्री. नितीन जंगम, श्री. विशाल बोडखे, श्री. सुरेश थरकुडे, श्री. मिनल थोरात, कु. चंचल माळी, कु. काजल भाकरे आदी उपस्थित होते.

—