शाळेतून पळवून नेत अल्पवयीन मुलीवर अत्याचार; आरोपी विरोधात गुन्हा दाखल

शाळेतून पळवून नेत अल्पवयीन मुलीवर अत्याचार; आरोपी विरोधात गुन्हा दाखल

मुख्याध्यापकांना खोटे सांगून मुलीला नेले, जळगावातील हॉटेलमध्ये घडली घटना

भुसावळ: भुसावळ येथील एका शाळेतून १६ वर्षीय अल्पवयीन विद्यार्थिनीला पळवून नेऊन तिच्यावर अत्याचार केल्याची एक धक्कादायक घटना उघडकीस आली आहे. या प्रकरणी तौसीफ जहाबाद तडवी (रा. पाल, ता. रावेर) याच्याविरोधात भुसावळ बाजारपेठ पोलीस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, रावेर तालुक्यातील १६ वर्षीय अल्पवयीन मुलगी भुसावळमधील एका शाळेत शिकते. ७ ऑगस्ट रोजी आरोपी तौसीफ तडवी हा तिच्या शाळेत गेला. त्याने मुख्याध्यापकांना एक खोटा अर्ज देऊन, आपण मुलीचा भाऊ असल्याचे सांगितले. मुख्याध्यापकांना फसवून त्याने मुलीला शाळेतून आपल्यासोबत नेले.

त्यानंतर तो तिला मुंबई, चोपडा आणि जळगाव या ठिकाणी घेऊन गेला. ९ ऑगस्ट रोजी जळगावातील एका हॉटेलमध्ये त्याने तिच्यावर अत्याचार केला. हा प्रकार उघडकीस आल्यानंतर पीडित मुलीच्या वडिलांनी तात्काळ भुसावळ बाजारपेठ पोलीस ठाण्यात धाव घेऊन तक्रार दाखल केली.

या तक्रारीवरून मंगळवारी, १२ ऑगस्ट रोजी रात्री १० वाजता आरोपी तौसीफ तडवी विरोधात गुन्हा दाखल करण्यात आला आहे. या प्रकरणाचा पुढील तपास सहाय्यक पोलीस निरीक्षक निलेश देशमुख करत आहेत.