शिक्षकांना हजेरी रजिस्टरवर वेळेत स्वाक्षरी अनिवार्य

शिक्षकांना हजेरी रजिस्टरवर वेळेत स्वाक्षरी अनिवार्य

मुख्याध्यापकांच्या नियमबाह्य व्यवहारावर शिक्षण संचालनालयाची कारवाई

जळगाव (प्रतिनिधी) – राज्यातील अनेक शाळांमध्ये मुख्याध्यापक आपल्या मर्जीने कामकाज करत असून शिक्षकांना शाळेत येताच हजेरीपटावर स्वाक्षरी करण्यास मोकळीक न देता, शाळा सुटण्याअगोदर स्वाक्षरी घ्यावी लागते, अशी गंभीर तक्रार समोर आली होती. या तक्रारींची दखल घेत महाराष्ट्र राज्य शिक्षण संचालनालयाने सर्व मुख्याध्यापकांना कडक निर्देश दिले आहेत.

आदेशानुसार, शिक्षक आणि शिक्षकेतर कर्मचारी शाळेत उपस्थित झाल्याबरोबरच हजेरी रजिस्टरवर स्वाक्षरी करणे बंधनकारक ठरवण्यात आले आहे. बऱ्याच शाळांत सकाळी हजेरी रजिस्टर मुख्याध्यापकांच्या ताब्यात ठेवला जातो, त्यामुळे शिक्षक वेळेत हजर असताना देखील त्यांना स्वाक्षरी करण्याची संधी मिळत नाही. ही पद्धत नियमबाह्य असल्याचे मानले गेले आहे.

सर्व विभागीय शिक्षण उपसंचालक, प्राथमिक व माध्यमिक शिक्षणाधिकारी तसेच मनपा शिक्षण प्रमुखांना नवीन आदेशानुसार शिक्षकांना वेळेत हजेरीपटावर स्वाक्षरी करण्याची काटेकोर खबरदारी घ्यावी, अशी सूचना देण्यात आली आहे.