शिरागड येथे सप्तशृंगी देवीचा यात्रोत्सवाला प्रारंभ

शिरागड येथे सप्तशृंगी देवीचा यात्रोत्सवाला प्रारंभ

तीन दिवस विविध धार्मिक कार्यक्रम; भाविकांमध्ये उत्साह

मनवेल, ता. यावल : परिसरातील श्रद्धास्थान असलेल्या शिरागड येथील श्री सप्तशृंगी देवी मंदिर येथे ३१ मार्चपासून यात्रोत्सवाला सुरुवात झाली असून, २ एप्रिलपर्यंत तीन दिवस विविध धार्मिक कार्यक्रमांचे आयोजन करण्यात आले आहे. या यात्रेमुळे भाविकांमध्ये मोठा उत्साह पाहायला मिळत आहे.
यात्रेनिमित्त होमहवन, पूजा-अर्चा, विविध धार्मिक विधी आणि पारंपरिक कार्यक्रमांचे आयोजन करण्यात आले आहे. तीन दिवस चालणाऱ्या या उत्सवात परिसरातील भाविक मोठ्या संख्येने सहभागी होत आहेत.

“लहान गड” म्हणून ओळख
कोळन्हावी व शिरागड गावांच्या मध्यभागी, तापी नदीलगत उंच टेकडीवर वसलेले हे मंदिर जिल्ह्यात “लहान गड” म्हणून प्रसिद्ध आहे. नाशिक जिल्ह्यातील सप्तशृंगी गड “मोठा गड” म्हणून ओळखला जात असून, शिरागड येथील मंदिराशी त्याचे धार्मिक नाते जोडले जाते.
भाविकांच्या श्रद्धेनुसार येथे देवीचे दर्शन घेतल्यास मनोकामना पूर्ण होऊन सुख-समृद्धी लाभते. त्यामुळे वर्षभर येथे भाविकांची वर्दळ असते, तर यात्रोत्सवाच्या काळात विशेष गर्दी होते.

यात्रेसाठी येणाऱ्या भाविकांच्या सोयीसाठी घामणगाव फाट्यापासून मनवेल मार्गे शिरागड गडापर्यंत रस्ता, वीज व पाण्याची सुविधा संस्थेमार्फत उपलब्ध करून देण्यात आली आहे.या यात्रेच्या यशस्वी आयोजनासाठी संस्थेचे अध्यक्ष योगेश सोळंके, सचिव प्रतापदादा सोनवणे, सरपंच योगिता सोनवणे तसेच शांताराम सोळंके यांच्यासह गावातील तरुण मंडळी परिश्रम घेत आहेत.साकळी पोलीस चौकीचे हवालदार अर्जुन सोनवणे यांच्या मार्गदर्शनाखाली पोलीस पाटील सुधाकर सांळुखे बंदोबस्तासाठी सहकार्य करत आहेत.

“भाविकांच्या सोयीसाठी सर्व सुविधा उपलब्ध करून देत सुरक्षित व सुव्यवस्थित यात्रोत्सव पार पाडण्याचा आमचा प्रयत्न आहे.” — योगेश सोळंके, अध्यक्ष, आयोजन समिती