शिवमहापुराण कथेनिमित्त फैजपुर परिसरात वाहतुकीत तात्पुरते बदल

शिवमहापुराण कथेनिमित्त फैजपुर परिसरात वाहतुकीत तात्पुरते बदल

१० ते १६ मार्चदरम्यान सकाळी ८ ते सायंकाळी ७ पर्यंत काही मार्गांवर वाहतूक बंद; पर्यायी मार्ग जाहीर

फैजपुर : प्रतिनिधी पंडित प्रदीप मिश्रा यांच्या शिवमहापुराण कथेनिमित्त फैजपुर परिसरात मोठ्या प्रमाणावर भाविकांची गर्दी अपेक्षित असल्याने कायदा व सुव्यवस्था राखण्यासाठी तसेच वाहतुकीचे नियोजन करण्यासाठी काही मार्गांवर तात्पुरते वाहतूक बदल करण्यात आले आहेत. ही अधिसूचना १० ते १६ मार्च या कालावधीत दररोज सकाळी ८ सायंकाळी ७ वाजेपर्यंत लागू राहणार असल्याची माहिती जळगावचे पोलीस अधीक्षक डॉ. महेश्वर रेड्डी यांनी दिली आहे.

कार्यक्रमस्थळ परिसरात वाहनांना प्रवेशबंदी
फैजपुर पोलीस स्टेशन हद्दीतील अकलूद शिवार, गुरुकृपा पेट्रोल पंपाच्या मागे भुसावळ–फैजपुर रोडवर शिवमहापुराण कथा आयोजित करण्यात आली आहे. या कार्यक्रमादरम्यान कार्यक्रमस्थळाकडे जाणाऱ्या सर्व रस्ते व उपरस्त्यांवर सर्व प्रकारच्या वाहनांना तात्पुरती प्रवेशबंदी करण्यात आली आहे.

भुसावळ–फैजपुर मार्ग बंद
भुसावळ ते फैजपुर रोडवरील हॉटेल रिव्हर पॉईंटपासून भोरटेक फाट्यापर्यंत सर्व प्रकारची वाहतूक बंद ठेवण्यात येणार आहे.

एसटी व हलक्या वाहनांसाठी पर्यायी मार्ग
भुसावळहून फैजपुरकडे जाणारी एसटी बस, कार, रिक्षा व दुचाकी वाहतूक अकलूद जुन्या टोलनाक्यापासून यावलमार्गे वळविण्यात येणार आहे. तसेच फैजपुरहून भुसावळकडे येणारी वाहतूकही यावलमार्गे तापी पुलावरून भुसावळकडे वळविण्यात येणार आहे.

सावदा–रावेर मार्गावरील वाहतूक वळवली
रावेर–सावदा–फैजपुर मार्गे भुसावळकडे जाणारी एसटी बस व हलकी वाहने बनाना सिटी सावदा येथून हतनूर–बोहर्डी फाटा मार्गे वळविण्यात येणार आहेत.

अवजड वाहनांसाठी स्वतंत्र मार्ग
रावेर–सावदा–फैजपुर मार्गे भुसावळकडे जाणारी मालवाहू अवजड वाहने यावल–किनगाव मार्गे जळगाव–भुसावळकडे वळविण्यात येणार आहेत. तसेच भुसावळकडून तापी पुलावरून फैजपुरकडे येणारी अवजड वाहतूक जळगाव–डांभुर्णी–किनगाव–यावल मार्गे वळविण्यात येईल.

चोपडा–यावल मार्गावरील वाहतुकीत बदल
चोपडा–यावलमार्गे भुसावळकडे जाणारी वाहतूक धानोरा फाट्यावरून वळवून डांभुर्णी–जळगाव मार्गे भुसावळकडे वळविण्यात येणार आहे.

नागरिकांना सहकार्याचे आवाहन
या कालावधीत वाहतूक व्यवस्थापनासाठी पोलिस प्रशासनाने केलेल्या बदलांना नागरिकांनी सहकार्य करावे, असे आवाहन पोलीस अधीक्षक डॉ. महेश्वर रेड्डी यांनी केले आहे.