श्रीराम नवमीनिमित्त दुमदुमले जळगाव

श्रीराम नवमीनिमित्त दुमदुमले जळगाव

मंदिरांत भाविकांची गर्दी; भव्य मिरवणुकीतून रामभक्तांचा उत्साह ओसंडला

जळगाव : राम नवमी निमित्त शहरासह जिल्हाभरात भक्तिमय वातावरण निर्माण झाले होते. पहाटेपासूनच विविध राम मंदिरांमध्ये भाविकांनी मोठी गर्दी केली होती. प्रभू श्रीरामांच्या दर्शनासाठी मंदिरांचे दरवाजे लवकर खुले करण्यात आले होते, तर दिवसभर धार्मिक कार्यक्रमांनी वातावरण भारावून गेले.
शहरातील चिमुकले राममंदिर, जुन्या जळगावातील ग्रामदैवत श्रीराम मंदिर तसेच उपनगरांतील विविध मंदिरांमध्ये विशेष पूजाअर्चा, कीर्तन आणि धार्मिक विधींचे आयोजन करण्यात आले. मंदिर परिसर आकर्षक रोषणाईने सजविण्यात आला होता, ज्यामुळे उत्सवाला अधिक रंगत आली.
सायंकाळी गोलाणी व्यापारी संकुल येथून भव्य मिरवणूक काढण्यात आली. या मिरवणुकीत रामभक्तांनी मोठ्या उत्साहात सहभाग घेतला. ढोल-ताशांच्या गजरात आणि जय श्रीरामच्या घोषणांनी संपूर्ण परिसर दुमदुमून गेला.
दरम्यान, विश्व हिंदू परिषद आणि बजरंग दल यांच्या संयुक्त विद्यमाने महापूजा व महाआरतीचे आयोजन करण्यात आले. यावेळी भाविकांनी मोठ्या श्रद्धेने सहभाग नोंदवला.
या कार्यक्रमाला राजू मामा भोळे, दीपमाला काळे, डॉ. महेश्वर रेड्डी, सुचिता हाडा, निलेश तायडे, योगेश्वर गर्गे, ललित चौधरी, देवेंद्र भावसार, राकेश लोहार आदी मान्यवरांसह मोठ्या संख्येने भाविक उपस्थित होते.
राम नवमीनिमित्त प्रसिद्ध प्रवचनकार दादा महाराज जोशी यांनी कथा वाचनातून प्रभू श्रीराम जन्मोत्सवाचे धार्मिक व सांस्कृतिक महत्त्व विशद केले. त्यांच्या प्रवचनाला भाविकांचा उत्स्फूर्त प्रतिसाद लाभला.