संशयावरून शेजाऱ्याने केली दगडफेक 

संशयावरून शेजाऱ्याने केली दगडफेक 

समता नगरातील घटना

जळगाव : घरातून बाहेर आल्याच्या केवळ संशयावरून शेजाऱ्याने एका प्रौढावर दगडफेक करून गंभीर जखमी केल्याची धक्कादायक घटना समता नगर परिसरात घडली. राजेंद्र हरिचंद्र सपकाळे (वय ४०, रा. समता नगर) असे जखमी झालेल्या व्यक्तीचे नाव असून, या प्रकरणी भास्कर पोपट वानखेडे (रा. समता नगर) याच्याविरोधात रामानंद नगर पोलीस ठाण्यात गुन्हा दाखल करण्यात आला आहे.

ही घटना ३ मे रोजी दुपारी चारच्या सुमारास घडली. राजेंद्र सपकाळे हे सेंट्रींगचे काम करतात. पाण्याची मोटार सुरू करण्यासाठी ते शेजाऱ्यांच्या घराजवळ असलेल्या नळाच्या कॉकजवळ गेले होते. मात्र, भास्कर वानखेडे यांना सपकाळे त्यांच्या घरातून बाहेर आले असल्याचा संशय वाटला. रागाच्या भरात वानखेडे यांनी गच्चीवरून मोठे दगड सपकाळे यांच्यावर फेकले. या हल्ल्यात त्यांना पाठीवर व हातावर गंभीर दुखापत झाली.

सपकाळे यांनी हल्ल्याचे कारण विचारले असता, वानखेडे यांनी काठीनेही त्यांच्यावर मारहाण केली व तेथून पळून गेले. जखमी अवस्थेत सपकाळे यांनी रामानंद नगर पोलीस ठाण्यात तक्रार दाखल केली असून, पोलीस निरीक्षक निलेश पाटील या प्रकरणाचा तपास करीत आहेत.