सराफी व्यावसायिकाची ९ लाखांची फसवणूक; संशयित अटकेत

सराफी व्यावसायिकाची ९ लाखांची फसवणूक; संशयित अटकेत

२९६ ग्रॅम सोने परत न करता विश्वासघात; जुन्या ओळखीचा घेतला गैरफायदा

जळगाव : दीर्घकाळाच्या ओळखीचा गैरफायदा घेत एका सराफी कारागिराने सुवर्ण व्यावसायिकाची ९ लाखांहून अधिक रकमेची फसवणूक केल्याचा प्रकार समोर आला आहे. अडचणीच्या काळात घेतलेले २९६ ग्रॅम सोने परत न करता विश्वासघात केल्याप्रकरणी संशयित सोनु डुंगरदास वैष्णव याच्याविरुद्ध शनिपेठ पोलीस ठाण्यात गुन्हा दाखल करण्यात आला असून त्याला अटक करण्यात आली आहे.

भिकमचंद जैन नगरातील रोहित अपार्टमेंटमध्ये राहणारे ओमप्रकाश हरीरामजी सोनी (वय ४९) यांचे बालाजी पेठेत ‘ओम ज्वेलर्स’ नावाचे दागिन्यांचे दुकान आहे. त्यांचे समव्यवसायिक असलेले सोनु वैष्णव (रा. लक्ष्मीनगर) याच्याशी गेल्या २० ते २५ वर्षांपासून व्यावसायिक संबंध होते. एकाच गावचा असल्याने सोनी यांचा त्याच्यावर प्रचंड विश्वास होता. सन २०१७-१८ मध्ये आर्थिक अडचण असल्याचे सांगून वैष्णव याने सोनी यांच्याकडून २९६ ग्रॅम २४ कॅरेट सोने घेतले होते.

दि. ९ मे २०२५ रोजी नोटरी करून सहा महिन्यांत सोने परत करण्याचा करार करण्यात आला होता. मात्र, मुदत संपल्यानंतरही संशयिताने सोने परत न करता टाळाटाळ केली. सुरुवातीला ‘व्यापारात नुकसान झाले’ असे कारण देत वेळ मारून नेली, तर नंतर स्पष्टपणे सोने देण्यास नकार देत दमदाटी केल्याचे फिर्यादीत नमूद करण्यात आले आहे.

याप्रकरणी १ एप्रिल रोजी शनिपेठ पोलीस ठाण्यात गुन्हा दाखल करण्यात आला. पोलीस निरीक्षक कावेरी कमलाकर यांच्या मार्गदर्शनाखाली गुन्हे शोध पथकाने तातडीने कारवाई करत संशयित सोनु वैष्णव याला अटक केली.

या कारवाईत पोलीस हवालदार अल्ताफ पठाण, योगेश जाधव, निलेश घुगे, अमोल वंजारी, पराग दुसाने व गणेश ढाकणे यांचा समावेश होता. संशयिताला न्यायालयात हजर केले असता त्याला पोलीस कोठडी सुनावण्यात आली असून पुढील तपास सुरू आहे.