सावद्यात ‘भारत गादी भंडार’ दुकानाला भीषण आग

सावद्यात ‘भारत गादी भंडार’ दुकानाला भीषण आग

बसस्थानक परिसरातील घटनेत सुमारे तीन लाखांचे नुकसान; सुदैवाने जीवितहानी टळली

सावदा (प्रतिनिधी) : रावेर तालुक्यातील सावदा शहरातील बसस्थानक परिसरात असलेल्या ‘भारत गादी भंडार’ या दुकानाला शुक्रवारी (दि. १३ मार्च) दुपारी अचानक आग लागून मोठे नुकसान झाल्याची घटना घडली. या आगीत दुकानातील गाद्या व इतर साहित्य जळून खाक झाले असून सुमारे तीन लाख रुपयांचे नुकसान झाल्याचा प्राथमिक अंदाज व्यक्त करण्यात येत आहे. घटनेमुळे परिसरात काही काळ घबराटीचे वातावरण निर्माण झाले होते.

मिळालेल्या माहितीनुसार, सावदा शहरातील बसस्टँड परिसरात एस. के. रेडियम दुकानाच्या शेजारी असलेल्या ‘भारत गादी भंडार’ या दुकानातून अचानक धूर व ज्वाळा बाहेर येताना दिसल्याने स्थानिक नागरिकांमध्ये खळबळ उडाली. दुपारी अंदाजे १ ते २ वाजेच्या सुमारास ही घटना घडली. परिस्थितीची गंभीरता लक्षात घेऊन नागरिकांनी तात्काळ सावदा नगरपालिकेच्या अग्निशामक दलाला माहिती दिली.

घटनेची माहिती मिळताच सावदा नगरपालिकेचे अग्निशामक दल तातडीने घटनास्थळी दाखल झाले. अग्निशामक जवानांनी तत्परतेने आग विझवण्याचे प्रयत्न सुरू केले. काही वेळाच्या अथक प्रयत्नांनंतर आगीवर नियंत्रण मिळवण्यात यश आले. वेळीच कारवाई झाल्याने आग शेजारील इतर दुकानांपर्यंत पसरण्यापासून रोखता आली.

या आगीत कोणतीही जीवितहानी झाली नसली तरी दुकानातील मोठ्या प्रमाणावर गाद्या आणि इतर साहित्य जळून खाक झाले आहे. त्यामुळे दुकानदाराचे आर्थिक नुकसान मोठ्या प्रमाणावर झाल्याचे सांगितले जात आहे. घटनेनंतर परिसरातील नागरिकांनी मोठ्या संख्येने घटनास्थळी गर्दी केली होती.

दरम्यान, आग लागण्याचे नेमके कारण अद्याप स्पष्ट झालेले नसले तरी शॉर्टसर्किटमुळे आग लागली असावी, असा प्राथमिक अंदाज व्यक्त करण्यात येत असून संबंधित यंत्रणेकडून पुढील चौकशी सुरू आहे.