सुनसगाव शिवारात मधमाश्यांचा हल्ला; चार महिला जखमी
हरभरा कापणीदरम्यान अचानक प्रकार; ग्रामस्थांकडून तातडीची मदत
भुसावळ : तालुक्यातील सुनसगाव येथील गोजोरा रस्त्यालगत असलेल्या शेतात हरभरा कापणी करत असताना मधमाश्यांच्या हल्ल्यात चार महिला जखमी झाल्याची घटना १ मार्च रोजी सकाळी घडली. शेतकरी एकनाथ गोविंदा भोळे यांच्या शेतात चारुलता एकनाथ भोळे, अनिता सतीश पाटील, रंजना रोहिदास पाटील तसेच एक पावरा समाजातील महिला काम करत असताना अचानक मधमाश्यांनी हल्ला चढवला. महिलांनी गावाकडे पळ काढला, मात्र मधमाश्यांनी पाठलाग करत दंश केला.
जखमींनी पाण्याच्या हौदात उतरून बचाव करण्याचा प्रयत्न केला. चारुलता भोळे या गंभीर जखमी झाल्या असून सर्वांना गावातील दवाखान्यात उपचारासाठी दाखल करण्यात आले. डॉ. सागर धनगर यांनी उपचार केले असून सर्वांची प्रकृती स्थिर आहे. शेतकऱ्यांनी शिवारात जाताना मधमाश्यांच्या पोळ्यांपासून सावध राहावे, असे आवाहन करण्यात आले.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
